FRANCE: UGU YARAAN 84 RUUX OO KU DHINTAY MEEL DAMAASHAAD UU KA SOCDEY

Ugu yaraan 84 ruux oo qaarkood caruur yihiin ayaa dhintay kaddib markii gaari xamuul ah la jiir siiyay dad u dabaaldegayay munaasabadda Maalinta Bastille.

Madaxweynaha Faransiiska, Francois Hollande, ayaa sheegay in aan sinaba loo diidi karin in dhacdadani ay ahayd weerar argagixiso.

Dacwad oogaha Nice, Jean-Michel Pretre, ayaa sheegay in gaariga uu xawaaro dheer dadka ku dhexmarayay masaafo laba kiilo mitir ah, ka hor inta aanay boolisku toogasho ku dilin darawalkii waday.

Gudaha gaariga ayaa waxaa laga dhex helay hub iyo bambooyin.

Waxaa hadda baaritaanka goobta ay wax ka dhaceen la wareegay askarta argagixiso la dagaallanka.

Madaxweyne Hollande ayaa shaaciyay in Faransiiska uu kusii jiray xaaladda degdeg ah, isla markaasna kumannaan millateri iyo boolis isugu jira ay ka qeyb qaadan doonaan sugida ammaanka dalkaasi.

Warbaahinta Faransiiska ayaa sheegeysa in warqado aqoonsi oo gaariga laga dhex helay ay muujinayaan in darawalka uu ahaa Faransiis asal ahaan Tunisia kasoo jeeda.

Ma jirto cid sheegatay mas’uuliyadda weerarkan.

Source BBC