Xisbiga KULMIYE oo Xaflad soo dhawayn ah u Sameeyey Haweenka Qurba-joogga ee Xisbiga.

Hargeisa(GNN):-Xisbiga KULMIYE, ayaa xaflad ballaadhan u sameeyey haweenka qurba-joogga ah ee xisbiga ee ku sugan dalka Somaliland xilligan.
Casuumad casho ah oo ay samaysay Agaasimaha Xafiiska Samofalka Madaxtooyada Marwo Aamina Maxamuud Diiriye oo lagu qabtay huteelka Ambassador ee magaalada Hargeysa xalay, waxa ka qaybgalay Guddoomiyaha KULMIYE, ahna murrashaxa Madaxweynaha xisbiga Md. Muuse Biixi Cabdi, xubnaha hoggaanka ee xisbiga, wasiirro ka tirsan xukuumadda, safiirro iyo boqolaal ka mid ah haweenka qurba-joogga ah ee xisbiga oo isugu jira masuuliyiin iyo taageerayaal.
Masuuliyiin iyo wakiillo ka socday laamaha qurba gaar ahaan dalal ka mid ah Yurub iyo Maraykanka oo ay ka mid yihiin Guddoomiyaha Laanta Sweden Fu’aad Kaamil, Nuura Waris oo ku hadlaysay afka gobollada Maraykanka, xubno ka socday Laanta Norway iyo Canada, ayaa ka xog-warramay shaqooyinka ay hayaan iyo taageerada baaxadda leh ee xisbigu ku leeyahay dibadda.
Sidoo kale, Guddoomiye-ku-xigeenka kowaad ee xisbiga Maxamed Kaahin Axmed, Xoghayaha guud ee KULMIYE Md. Xasan Siciid Yuusuf, Guddoomiyaha Garabka haweenka ee xisbiga Marwo Canab Cumar Ileeye, Wasiirrada Maaliyadda Marwo Samsam Cabdi Aadan iyo Qorshaynta Cali Xuseen Ismaaciil (Shoombe), Wasiir-ku-xigeenka Warfaafinta Marwo Shukri Xariir Ismaaciil, Agaasimaha Xafiiska Samofalka Madaxtooyada Marwo Aamina Maxamuud Diiriye, Xildhibaan Maxamed Cali Xirsi (Obama) iyo La-taliyaha Arrimaha Dhaqaalaha ee Madaxweynaha Axmed Xasan Carwo oo dhammaantood xafladda hadallo ka jeediyey, ayaa u mahadceliyey qurba-joogga xisbiga kaalinta ay mar walba kaga jiraan guulaha xisbiga.
Ugu dambayntii, Guddoomiyaha KULMIYE, ahna murrashaxa jagada Madaxweynaha Md. Muuse Biixi Cabdi, ayaa khudbad uu halkaasi ka jeediyey hadal isugu jira mahadnaq, ammaan iyo dardaaranba siiyey qurba-joogga.
Waxa kaloo uu Guddoomiyuhu ka hadlay u diyaargarowga iyo qabashada doorashooyinka soo socda, waxaannu sheegay in KULMIYE yahay xisbiga keliya ee u diyaarka ah doorashada, halka xisbiyada mucaaradku u muuqdaan kuwo ka cago-jiidaya qabsoomideeda.

 

13707773_270654346631625_6859087035256945282_n

13754492_270654359964957_2978909217603314599_n

13770309_270654353298291_5438630599223996286_n13612284_270654449964948_3602911366982968234_n

13615276_270654586631601_8669531279319930179_n

13690717_270654453298281_3228559778793285779_n

13754492_270654359964957_2978909217603314599_n

Hargeisa Somaliland
Gabiley News Network
Axmed Almis.