Madaxweyne Ku Xigeenka Somaliland Oo Madaxtooyadda Ku Qaabilay Aqoonyahanka Shaqaalaha Dawladda ee Waxku Bartay Dalka iyo dibada  

Hargeysa(GNN)Madaxweyne Ku Xigeenka Somaliland, Md. Cabdiraxmaan Cabdilaahi Ismaaciil (Saylici) oo ay wehelinayaan, Wasiirka Wasaaradda Madaxtooyada, Md. Maxamuud Xaashi Cabdi, Wasiirka Wasaaradda Xanaanada Xoolaha, Md.Cabdilaahi Maxamed Daahir (Cukuse),Wasiirka Wasaaradda Arrimaha Gudaha, Md. Yaasiin Xaaji Maxamuud Xiir (Faratoon), Wasiirka Wasaaradda Duulista iyo hawada, Md. Farxaan Axmed Haybe iyo Agaasimaha Guud ee Wasaaradda Shaqada iyo Arrimaha Bulshada, ayaa qasriga Madaxtooyada ku qaabiley aqoonyahan ka socda Ardayda wax ku soo baratay dalka Itoobiya ee aynu jaarka nahay kuwaasi oo fursad u helay inay noqdaan aqoonyahanka dawladu ku tacabtay ee dalka wax u soo bartay.


 

Kulankan oo ay ujeedadiisu ahayd sidii dhalinyarada aqoonyahanku qayb uga noqon lahaayeen dib u habaynta iyo horusocodka nidaamka dawladnimo ee la soo dhisayey 26 sano ee la soo dhaafay iyo in dhalinyaradaasi aqoonyahanka ahi dib ugu celiyaan dalkooda hooyo aqoonta ay u soo barteen ee xukuumaddu ku taageertay, qaybta ugu weyna ay iyadu lahayd madaama oo ay dawladu dirtay aqoonyahankan oo ah shaqaalaha dawlada intooda badani. Waxaana ka mid ahaa weedhihii aqoonyahanka ka soo burqanayey dadka waxa aanu u sheegaynaa in aanay xukuumadu dhisin daaro dhaadheer oo keliya ee ay dhistay quluubta dadka oo aanu anagu tusaale u nahay kuwa la dhisay ee tacabka la geliyey.

 

Madaxweyne Ku Xigeenka Somaliland, Md. Cabdiraxmaan Cabdilaahi Ismaaciil (Saylici) oo  halkaasi ka hadlay ayaa yidhi “Waxa maanta sharaf noo ah intan oo aqoonayahan ah oo waliba ah aqoonayahankii ku dhex tababartay shaqaalaha dawladda farxad weyn bay noo tahay waa mucdii dawladda iyo dibu habayntii aanu la kawsanay markii aanu xilka qabanayna waxa kamid ahaa in kor uqaadida aqoonta iyo tayada shaqaalaha waxa laynaga rabaa dhamaanteen in ninku marka uu wax soo barto inaanu waxbarshadiisii is garab dhigin.

 

“Dunidu dadka ku dhaqan ee cadaanka ahi waxay shaqadooda u ilaashadaan si cajiiba inaguse muhiimad badan ma siino 4saac ma 2saac ayuu shaqaynayaa dabadeed uu cararayaa, waxaynu u baahannahay inaynu isku duubnaano oo aynu meel uwada jeesano waayo koox kasta oo isku duubani wax bay sixi karaan”.

 

“Aqoontu iyadoo halkan taalla in dibad loo doontaa ma haboona waana in aynu aqoonta halkan taalla adeegsano midna dafiri maynee aqoonta waxaad moodaa inay wali wax ku fadhiyaan dalkan bur-bur baa ku dhacay oo dhisme ayaynu bilawnay ALLE ha naxariistee Madaxweynihii hore ee Somaliland Maxamed Xaaji Ibraahim Cigaal ayaa waxa la yidhi nin baa loo keenay malaha af carabiga iyo ingiriisida layidhi uu yaqaanaa markaa noo qor baa lagu yidhi, dabadeed wuxuu yidhi “waar anigu nin af ingiriisi iyo carabi ku hadla dooni maayee nin Ciidagale ii keena ayaan u baahnahay” yacni saacadaas xaalada taagnayd ayaa caynkaas ahayd waxaadse moodaa inaynu wali tii ku joogno, runtaa wanaagsane ilaa maanta inaynu tii ku joogno oo wali aqoontii sidii loo rabay aan la gaadhin, waxaase loo baahan yahay waa wakhtigii aqoonta la adeegsanayaye, idinkana waxa idinka xoog batay caaqil wax ale iyo wuxuu bartay aanay jirin, ayaa saacad walba sanka naga soo galaya oo wasiir iyo cid walba hoos joogee, isaga aqoontu meesha haka saarto.

 

Muddadii aanu joognay ka xukuumad ahaan annagu isma amaanaynee intaasoo xeer oo qabyo ah ayaanu dhamaystirnay inbadan oo ina sugaysaana way jirtaa waana runtaa oo qofkii muwaadinka ahaa haduu hawl aqoonteedii leeyahay sabab  qof ajanabi ah loogu yeedhaa ma jirto idinka qudhiinuna fadhiga ka kaca waxaan aad u hambalyaynayaa machadka CSI ee tababarka shaqaalaha dawlada  isku xidhkaa dawlada itoobiya maadaama inagu aynu dal cusub nahay inay inagu caawiso jaamacadaas ragii kasoo shaqeeyay haday gudoomiyeyaashii hore yihiin iyo haday rag maanta dawladda jooga yihiinba runtii Ilkacase agaasimaha shaqada iyo Arrimaha bulshada waxaad moodaa inuu kamid yahay dadka noo qaabilsan Itoobiya oo asxaab badan ku leh, xidhiidhkeenana in badan qayb ka qaata.

 

Inaynu tallo iyo tusaale isa siinaa markasta way haboontahay sida aad sheegteene wax walba oo aynu saxan kari lahayn waxaad moodaa inaynu saxaafada lasoo istaagno oo maanta Saxaafada si xun ayaynu u isticmaalnaa si kawanaagsan baa loo isticmaalaa oo talooyin ayaa laysu soo jeediyaa, waa laysu yimaada, waa lawada hadlaa oo halkaas waxaas ka toosiya ayaa la yidhaahdaa in aqoonta la qiimeeyana waanu qaadanaynaa golaha wasiiradana waxaanu aniga iyo Madaxwaynuhu faraynaa inuu wasiir waliba qiimahiisa siiyo ninka aqoonta leh ee ku jira wasaaradiisa waxaynu doonaynaa inaanu shaqaalaha dawlada siyaasada ka saarno oo ay noqdaan kuwii dalka iyo dadkaba dhisayay wixii khaldamayna waynu saxaynaa insha Allaah aqoontana halkeedii ayaanu keenaynaa waxaa sharaa’ig iyo maalgashi maanta aanu samaynayna dadkii la xaajoon lahaa waa inay aqoon yeeshaan”ayuu yidhi Madaxwayne ku-xigeenka Qaranka Somaliland, Md Cabdiraxmaan Cabdilaahi Ismaaciil Saylici.

 

Waxa isna halkaasi ka hadlay Wasiir Cukuse oo ay hadaladiisi ka mid ahaa“Marka hore waxaan doonayaa in aan tafsiir yar kabixiyo dhalinyaradani waa kuwama?, marka labaadna aynu eegno maxay inagu soo kordhinayaan, dhalinyaradani waa dhalinyaro ka dhashay tacabkii Somaliland, waa ruuxdii Somaliland oo qof ah, dhalinyaradani waxay ku barbaareen oo ay wax ku barteen oo ay ka shaqeeyeen Somaliland intaa markay noqdeen ayay waxbarasho dheeraada dibeda u doonteen dabadeed may tacabirine (Tahriibine) ee dalkay kusoo noqdeen markaasay shaqeeyeen”.

 

“Intooda badan waxay haystaan ugu yaraan 2 Degree maaha qaar markooda horaba meel fog ka yimi oo xogtu ku yar tahay dhalinyaradani waxay joogeen intii Somaliland jirtayba waxay la socdeen talaabo kasta oo la qabanayay waxay garanayaan in Maxamuud Xaashi 1991 Maayirka Burco ahaa oo ma odhanayaan xaguu dalka kasoo galay, waxay garanayaan maalin walba talaabadii la qaadaayay iyo carqaladii ka hor imanaysay waxay goob-joog u ahaayeen sidii looga baxay.

 

“Maanta maxay inagu soo kordhinayaan?,intaynan galin waxaan kusoo koobayaa erey aan shalay hortooda ka idhi in badan bay dhalinyaro ahaayeen, in badan bay arday ahaayeen, in badan bay shaqaale ahaayeen, in badanbaa loo qudbadayn jiray oo lagu odhan jiray waxaad tihiin madaxdii barito  baritadii ayaa la gaadhay oo maanta weeye waxay imika macalilmiin ka yihiin jaamacadaha dalka waxay wax ka dhigaan goobaha waxbarashada ee waaweyn waxay joogaan hay’adaha dawladda iyo kuwa caalamiga ahba meelo wanaagsan bay ka joogaan.

 

Way dadaaleen iyagaa isu tagay waxay yidhaahdeen dalkeenii aynu wax ku celino Jamhuuriyada Somaliland ayay sidaas u eegeen waxa u muuqday in dhaqaalaha iyo arrimahiisu yihiin mushkilada haysata dalkan sidii uu dhaqaalihiisana usoo saaran lahaa sidii uu hantidiisana isugu filaysiin lahaa sidii uu dabadeed horumar ugu samaysan lahaa ee dakhli loo abuuri lahaa loona ilaalin lahaa meel wanaagsana loo galin lahaa .

Waxay damceen inay wax inagala qabtaan gol-daloolooyinka cadaalada ka jiri kara iyo shuruucdooda waxay wax inagala qabanayaan iyagoo tacabkii dalku gashaday soo celinaya  halkii inta ay shir jaraa’id qaban lahaayeen oo ay ina caayi lahaayeen waxay garteen inay dawladda la fadhiistaan oo ay dhagta u saaraan waxa wanaagsan inoo sheegaan ayay doonayaan waxay doonayaan inay qoraal iyo ficilba kusoo gudbiyaan.

 

Madaxwayneku-xigeenka oo musharaxa beri ee ku xigeenka ah hadana jooga, wasiirka Madaxtooyada, Wasiirka arrimaha gudaha iyo wasiiradii kale ee ay codsateen oo shaqo ku maqan ee ay kamidka ahaayeen Wasiirkii qorshaynta, Wasiirkii Maaliyadda, iyo Wasiirkii Cadaaladda dhamaantood fariintaas waxa gaadhsiin doona Madaxwayne ku-xigeenka iyo Wasiirka Madaxtooyada iyagaana inoo sheegi doona xidhiidhka aynu wada yeelanayno. waxan dhalinyarada leeyahay soo dhawada dalku waa dalkiini intaad gashataan ayuunbaad ka heli doontaan”Wasiirka Xanaanada Xoolaha ee Somaliland Cabdilaahi Cukuse.

 

Wasiir Maxamuud Xaashi Cabdi oo isna halkaa ka hadlay ayaa yidhi “Waxaan aad iyo aad u aaminsanahay in aqoonta dhalinyaradani ay tahay wax aad u muhiima, in laga faa’idaystaa ay lagama maarmaan tahay inaad tihiin tacabkii iyo ubaxii qarankani uu waraabiyey ee soo saaray runtii aad iyo aad baan u qiraynaa”

“Waxaan jecelahay anigoo munaasibadan ka faa’idaysana inaan u mahad naqo dawladda itoobiya ee aynu deriska nahay saaxiibada isku sidkan nahay jaarkana aynu nahay, oo deeqdaa waxbarasho gaar ahaan (post graduate)  ina siisay maxadkeena shaqaalaha, runtii waxanu qiraynaa inuu ahaa mashruuc aad u qiimo badan, waxa aanan aaminsanahay oo ku bogaadinayaa hay’adda shaqaalaha qaranka iyo machadka shaqaalaha dawladda labadaba siday u maamuleen inay ahayd si aad iyo aad u qiimo badan oo shaqaalaha wasaaraduhu soo diraan aqoon lagu kala xulo ee musuq maasuq reernimo iyo qaraabo kiil lagu xulin ayaan runtii qirayaa. wasaaraduhu sannad walba way galaan tartankaa anigu intii aan ahaa wasiirka duulista muddo shan sanno ah  fursad kamaanu helin  xaqiiqdii, laakiin waxaan qiraya si wanaagsan in loo maamulay, aqoonta halkan fadhidaana kasoo baxday ka muuqata fagaarayaasha iyo kulanka, waanu u qiraynaa machadka dawladda itoobiya dadka dhalinyarada ah ee aynu soo saarnay”

“Burbur ayaa qarankii Somaliya la odhan jiray ku dhacay dib baynu usoo kabanay waxbaynu yab yabanay dad aqoonta waxbarashada ku fiican ayeynu ahaan jirnay, markaa waxa laga yaaba marka aynu dunida tagno magaceena oo dacaayado badan lagu sameeyey oo dunida Miidhiyuhu (Media) gudbiyeen fariimahaa dad argagaxiso ah, dad budhcad badeeda, dad gaajo u dhinta markiiba la yidhaahdo marka qof aqoonle laga arko magaca Soomaliyeedba isku daroo, dal madax banan baynu nahay balse Soomaali baynu nahay, Bulsho Soomaaliyeed baynu nahay dad kaloo badana waa bulsho soomaaliyeed waa qoomiyad Somalinimadu, waana magac aynu wadaagno, markaa marka magacaa la arko in laga boodo amma la qariibsado aqoontaa”

“Waxaan xasuustaa 15-wiil oo dhalinyaro ah baa markaan Wasaaradda Duulista Wasiirka ka ahaa aanu u dirnay Itoobiya, oo soo baranayey hagida diyaaradaha iyo waxa la midka ah (Aviation and Air Traffic Control) la isku yidhaahdo, dhalinyaradaas iskuul gaara ayaa loo furay, Machadka Itoobiya ee (Aviation-ku) waa maxad caana oo aad u sareeya oo Africa oo dhan caan ka ah, dawladdo badan baa soo dirta oo lacag ka bixiya dhallinyarada deeq waxbarashaa lanoo siiyey kharashkooda kale annagaa qabnay Wasaarad ahaan, meel baanu ku ururinay, markii horena waxaanu ku xulnay si fiican dhalinyaro wanaagsan oo gobolada dalka oo dhan ka soo xulnay oo isu miisaaman oo Jaamacadahaanu ka qaadanay, dhalinyaro wada jaamiciyiin ahbay wada ahayeen waliba arday (A Student) bay-wada ahaayeen, Imtixaan baanu ka qaadnay hay’adda shaqaalahaa nala qaaday, luuqadooda, aqoontooda, kormeer baan maalin ku tegay waxay aad u majeerteen macalimiintu way ii mahad naqeen waxay yidhaahdeen waligayo nama soo marin (Class) kaas oo kale waxanu wax u tababarnay waddamada Africa saddex dal baanay sheegin , wali nama soo marin (Class) lamida dhawr iyo tobankaa wiil oo ka ugu yari uu ku baasay Imtixaanka 90%  qaarba 100% keenay Imtixaanadii oo dhan, runtii waxay muujinaysaa aqoonta dhalinyaradeena”

“Waxaa dhaba Xukuumadda Madaxweyne Axmed Siilaanyo gadhwadeenka yahay daaro iyo wadooyin qudha iyo horumar dhaqaale ma keenin ee waxay keentay aqoon, iskuuladii bay kor u qaaday ubaxanaa kasoo baxay runtii waa wax taariikhdu xusi doonto, waxba siyaasadda iyo ragga ku loolamaa gaar ahaan soomaalidu waxba isuma qirto iska daa aqoon aan muuqane idinka beri horaa laydin dafiray laakiin aqalo muuqdaa la dafiray oo aanu dhisnay oo la nashuushadeeya iyo waddooyin aanu dhisnay heerkaasay maraysaa. Rag kamida siyaasiyiinta mucaaradka Somaliland ah oo aanu siyaasadda ku xafiiltano ayaa haday karayaan Sacabka ku qarin lahaa cadceeda, markaa runtii waxaan leenahay annagu waanu ognahay xukuumaddii baanu nahay waxan beertay inuu ubaxani jiro, Faankaba waa lagaga fiican yahay xukuumadda  iyo xisbiga Kulmiye dadku waxaabay yidhaahdaan waxba waydaan sheegan karayn,  annagoo afmiishaaro iyo aftahano doonana mooyane”

“Xukuumada Madaxweyne Siilaanyo iyo Cabdiraxmaan Saylici gadhwadeenka ka yihiin da’ayarta Somaliland korbay u soo qaaday fursadahooda shaqo iyo xilalkooda siyaasigaa, 42 xilbuu Madaxweynuhu saxeexay dad dhalinyaro ah Wasiiro ah Wasiiro, Dawlayaal iyo Wasiir ku xigeeno, Gudoomiyayaal hay’addo ah runtii waa tusaale wanaagsan sidoo kale Wasaaradda laftoodana (Transformation) ku waa ka jiraa in dhalinyaradan aqoonta leh ee wax baratay laga hawl geliyo wasaaradaha waabay ka mid yihiine wixii ku jira kor loo soo qaado waan soo dhaweynaynaa in aqoontiina la tijaabiyo way hagagsan tahay fariintaa waan qaadi doonaa golaha wasiiradana waanu ka sheegi doona, xilkuna qof qof buu wasiirada u saamaynaya, Madaxweynahana waanu gaadhsiinaynaa si uu u dhiiri geliyo Madaxweyne ku xigeenkiina waa ina fadhiyaa waxay ila tahay in dhagaxaasi saaka meel dheer ku dhacay”

“Isbedel weyn baanu dhallinyarada ku samaynay mudadii aan halkan joogay anigu wasiirka ka ahaa (Reshuffle) baan sameeyey raggii waa weynaa ee aan wasaaradda ugu imi ee agaasime waaxeedyada ka ahaa oo dhan waxaan ku idhi waad soo shaqayseen qarankaad u hiiliseen odayaal baad tihiin aqoon baa idinku duugan, waxaad u baahan tihiin inad nasataan dhalinyaradana meelaha u banaysaan la taliyayaalna aad noqotaan idinkana idin xoori mayno, waxaan magacownay dhallinyaro maamulka madaxtooyada waxa noo haya wiil (Master) ah dhallinyaro ah oo aan soddonka gaadhin” Naasirkaa aad amaanteenbaa ka mid ah oo Agaasimaha Waaxda Xidhiidhka dadweynaha iyo Siyaasada, Naasir kaa ag fadhiya ayaa ka mid ah oo agaasimaha waaxda saxaafadda ah, nimcaan oo aad u jeedaan inuu yahay gashaanle da’a yar ayaa ka mid ah oo weliba ah madaxa hawlgelinta Ciidanka Ilaalada madaxtooyada ah.

“Waxaan leeyahay idinkana waxaa idinku waajiba inaad dayntii soo celisaan ee uu dalku idinku lahaa, annagana waxaa nagu waajiba inaan idin maalno laydinka faa’idaysto idinkuna faano labadaa xil baa nala gudboon. Runti ahaantii qarankan ragga hogaaminayaa waa rag iilaa iyo halkaa aad ka waramaysan  kasoo bilaabay iyagoo dhallinyaro ah. Hoggaamiyaha wanaagsani waa ka leh hal-abuur waa ka leh hilaadin, hubsiimo, hal adayg, hufnaan, himillo iyo hami fog oo ummadeed, sidaasaa qaranku uu ku meel maraa oo ku dhismaa idinkuna inaad tabtaa iyo tubkaa aad daba socotaan, waa lagama maarmaan”

“Waxaa inoo ballan ah in aynu qarankeena u adeegno si daacad ah, in aynu dedaalka laban laabno, inaynu gacmaha is qabsano, waan soo dhaweynaynaa talooyinkiina iyo tilmaamihiina, waan soo dhaweynaynaa dhaliilaha maamulkeenu leeyahay, ka guban mayno ka xanaaqi mayno, xukuumadani waa xukuumad bisil oo rag waa weyn oo siyaasiyiini hogaamiyaan oo halkaa aad ka waramayseen ka soo bilaabay oo tub dheer hogaaminta qarankan usoo maray oo aan iskaga soo boodin oo aan odhan hadaan kooyaa,  waxaa weeye ragganimaday ka mid tahay in waxa kaa xumaada aad toosiso  bini aadam baynu nahay waa qaldami karnaa, odhan mayno waxba maanu qaldin, odhan mayno waxba ma qaldi karno, waxaanu leenahay wax faro badan baanu qabanay way jiri karaan dhaliilo iyo godaloolooyin, diyaar waxaanu u nahay kuwaana inaanu toosino, bulshada Somaliland ee caafimaadka qabta haday farta noogu fiiqdo dhalinyarada aqoonyahanadu haday farta noogu fiiqaan, culimada. Diyaar baanu u nahay in naloo nasteexeeyo na-lala taliyo, Waxaan idin ku boorinaynaa in aynu la dagaalano qabyaalada, qaranimada inaynu u hiilino oo dhisno  door badan baad qaadan kartaa, waxaynu u baahan nahay waddaniyada inaynu kordhino oo aynu xoog saarno  qarankeenu uu dhismaya waddaniyadiisu inay dhisantaa muhiim, inagu waa inaynu is dhaliilaa waa inaynu loolanaa aqalkeena gudihiisa marka aqalkeena aynu kadinka ka baxno saaxiibaynu nahay waa inaynu qaranimadeena ku dagaalanaa nabad gelyadeena adkaynaa wadaniyad wada lahaanaa waa inaynaan faanin kaynu is hayno, waa inaynu qarankeena faafinaa oo weynaynaa aad iyo aad baad u mahadsan tihiin” Wasiir Maxamuud Xaashi.

Dhinaca Aqoonyahanada oo ay u hadleen, Xamse Xaaji Muuse, Mustafe Cabdi Jaamac, Yuusuf Maxamed Cabdi Raage, Cabdiraxmaan Hirad Jaamac, Ubax Maxamed Maxamuud iyo Yaasiin Deheeye Aadan, waxay dhamaantood uga mahadnaqeen madaxweyne ku xigeenka, Wasiirka Madaxtooyada iyo Masuuliyiintii kale ee halkaasi kula sugnaa sida qiimaha badan ee ay u sharfeen una soo dhaweeyeen, iyagoo si gaara ugu mahadnaqay Wasiirka Wasaaradda Xanaanada Xoolaha Md Cukuse oo ay aqoonyahanku aad uga mahad sheegteen sida uu hawshan uga gacan siiyey ugana soo shaqeeyey in ay kulankan muhiimka ay ku yeeshaan qasriga madaxtooyada loona tixgeliyo aqoontooda iyo aragtida ay jeclaysteen inay la wadaagaan madaxda dalka.

 

Mustafe Cabdi Jaamac  oo ka mid ahaa aqoonyahankaasi ayaa sheegay in Dawladda Somaliland ay awooda saartay sidii kor loogu qaadi lahaa tayada iyo aqoonta Shaqaalaha Dawladda islamarkaana ay qal qaalisay  sidoo shaqaalaha muwaadiniinta ahi ay u heli lahaayeen aqoon dibadeed si kor  ugu qaado xirfadahooda iyo adeegyada ay qaranka u hayaan,  sidoo kale waxa uu xusay in Dawladda aynu jaarka nahay ee Itoobiya ay  Somaliand ugu deeqday deeqo waxbarasho  isla mar ahaan taana ay hadda 83-arday kasoo qalin jabiyeen Machadka tababarka shaqaalaha ee Itoobiya, kuwaasi oo loo soo tababaray inay horumariyaan waxna ka bedelan hay’addaha dawlaga ee Somaliland. 83-ka qof  ee kasoo baxay Itoobiya ayaa dhamaantoodba nasiib u helay inay qalin jebiyeen mudo xileedka Xukuumada uu Hogaamiyo Madaxweyne siilaanyo marka laga reebo 6-qof, Mustafe ayaa sheegay inay haboon tahay in lagu xuso buuga waxqabadka iyo horumarka Somaliland ee xukuumadu sannadkiiba mar soo saarto tacabkaasi,   waxaana uu qiray in Xukuumaddu aanay dhisin daaro keliya ee ay dhistay dad aqoonyahano ah oo qarankan u soo kacaya. waxa uu xusay in hore loo odhan jiray Shaqaalaha Dawladda kuma jiraan wax Master sita, maantana ay ka buuxaan.

Yuusuf Maxamed Cabdi Raage oo ka mid ahaa aqoonyahanka ayaa yidhi“Dhalinyaradayadanu waxaanu u baahan inaanu qaranka u adeegno oo wax badan u qabano, waxaananu mari doonaa hilinkii uu jeexay Madaxwayanaha Jamhuuriyada Somaliland, waxa nagu jirta wadaniyad caadifadaysan oo ah si aqooni ku dheehan tahay, waxaanu u hiilaynaa qarankayaga haddii madaxdu noo hiiliso. Waxaanu diyaar u nahay in baahiyaha waaweynee dalka yaala aanu wax ka qabano sida  sicir bararka iyo qiime dhaca shilinka Somaliland, waxaanu tallo ku soo jeedinaynaa in Madaxtooyada lahoos keeno Xafiis isku duba rida siyaasadaha qaranku leeyahay  waxaanu soo jeedinaynaa in la xoojiyo xafiiska kormeerka qorshaynta ee wasaarada qorshaynta”.

 

Ubax Maxamed Maxamuud oo ka mid ah aqoonyahankii la kulmay Madaxweyne kuxigeenka ayaa tidhi “Hablo aqoonyahano ah oo dalka jooga ayaa jira meeshay doonaanba wax haku bartaane wali ma arkin mana maqlin gabadh dhalinyaro ah oo dawladda ka muuqata, markaa waxaan idinku boorinayaa inaad halkaana eegtan. midbaa lagu odhanayaa inankii odaybaa wada markaa inantii cidi ma wadee qarankay dhex u tahay miyaa marka Madaxwayne ku xigeen  Cv-yada laydiin soo gudbinayo ee odayaashu idiin soo gudbinayaan waxa qurux badan in aad tidhaahdo reer walowba CV-yada dhawr hablood ku soo dara.

Wa-bilaahi tawfiiq

Xafiiska Warbaahinta iyo Saxaafadda Madaxtooyada

(272)