Taariikhdii Mujaahid Maxamed Haashi (Lixle)(qaybtii 2aad)

Qaybtii hore ee tixda ahayd waxaynu ku guud marnay, mujaahidnimada Mohamed Xaashi Lixle heerka ay gaadhsiisneyd, ( ILLAAH naxariistiisa ha ka waraabiyo’e) iyo wixii uu ka dagaalamay. Sida aan war bixinta ku soo helay, waraysigii aan u galay taariikhda Mujaahidka ( Allah yarxamo’e), waxa la leeyahay wuxu ku dhashay Go’da, dadka qaarna Berbera ( labada sheekoba way jiraan mid sax ahba),

Dusiga hoose wuxu ku soo qaatay Cadaadley, ka dhexe iyo ka sarena Sheekh oo uu ka baxay 1962kii, ka dibna ciidamadii Somaliya wixii la odhan jiray buu galay, isla sanadkaa dabayaa-qadiisii, isaga oo xidigle lagu qaatay, waxa loo diray dalka Ruushka. Mudo 7 sano ah, halkaas oo uu ka soo bartay, kuna takhasusay aqoonta dhismaha Kaaraha (wuxu ahaa Tangist Engineer), wuxu ka gaadhay derejada Kornaylka, in kasta oo uu ahaa ragga xooga loo cadaadinayo, waxa uu haysan jiray dhamaan wershadaha hubka sameeya, oo ta Hargaysa ugu dambaysay, ama kaba ee maamulkii af-lahaarkii ilko-jaqfle, waxana laga qaaday markii laga shakiyey, in uu hoosta kala socdo dhaqdhaqaaq wadaniyeed oo goboladda Waqooyi ka socday (Somaliland), wakhtigaas oo ahaa sideetankii (1980ggii), markaas oo buulka wixii la odhan jiray la dhigay ( kaas oo micnaheedu ahaa waxba laguu diran maayo ee iska fadhi, waxa ku soo galay shakiye). Mudo ayuu Hargaysa sii joogay, intii lagu dhawaaqaayey magaca S.N.M taariikhdu markay ahayd 06/04/1981.
Ka dib waxa uu toos ugu wareegay aasaasiddii jabhaddii S.N.M, si uu jabhadda ugu abuuro ciidan, halkaas oo uu isaga iyo askartii ugu horeysey, ee gudubtay uu ka mid noqday, kuna talaabsaday in ay jabhadu noqoto mid tababaran oo ummadda Somaliland ka dhicisa xaaqiddii uu maamulkii Afweyne ku waday, taas oo ay ku guulay-steen raggii uu ka mid ahaa ee salka u dhigay jabhadda. Wuxuuna ka qayb galay dhawr dagaal oo lagu wareemay Faqashtii, siddii tii uu Moorgan iyo raggii la socday ay is yidhaaheen soo qab-qabta, soona sawira, ee macaa kamaraddii laga qabsaday, Moorgana uu dirqiga ku baxay ee guudka Hargaysa.
ILLAAH sw ha u naxariisto’e, wuxuu ahaa geesi miigan, oo calool adag, biixi ah, sooma-jeeste aan gaban, ku talax tegay aqoonta ciidan ee uu adeegsa-naayey, wuxu ahaa nin isku kalsoon, kuna leh hoodo dagaal kasta oo uu galo, in uu guul ka soo hooyo, taas oo ku keliftay inuu kaga gilgishay xumaantii dadkiisa iyo dalkiisa lagula kacay, waxaa si gaar ah loogu tiriyaa marxaladahan hoos ku qoran oo uu guulo lama illaawaan ah ka soo hooyey (in kaste oo ay badnaayeen), misana kuwa ugu waaweyni waxay ahaayeen.:-
* Jebintii Xabsigii Dhexe Ee Mandheera, oo ay maalin Isniin ahayd, tirsadka taariikhduna ay ahayd 03/01/1993, wakhti goor dambe ah, oo habeenka badhkii tegay, inta ay isu daruuri-yeen, isaga iyo ciidankii la socday ee uu soo xushay, boodhka kaga hurgufeen injirtii meesha haysatay, ka dibna ay kala baxeen 11 oday oo lagu haystay jeelka, isla markaana laga sii daayey in ka badan 700 oo maxbuus ( sida uu ii sheegay Duuliye Xayd), wixii ay hub yar-yar ay qaadan karayeena la baqooleen, halkaas oo laba oday oo socon kari waayey, ay jeelkii dib ugu soo noqdeen, sagaalkii kalena ay cidhibta ku dhufteen ilaa iyo ay ka gudbeen xadkii, magacyada 11ka oday ee ay kaxays-teen waa kuwan hoos ku qoran:-
(1) Aadan Maxamed Siraad ( H.Yoonis),
(2) Aadan Maxamed ( Aadan Ruush, Sacad Muuse),
(3) Axmed Maxamed Rasheed (H.Yoonis),
(4) Cabdiraxmaan (Ma hayno magaciisa kale) Ciise Muuse),
(5) Ismaaciil Xaaji Cabdi ( H.Yoomis),
(6) Cumar Gaab ( H.Yoonis),
(7) Yuusuf Dhega weyne (Ciise Muuse),
(8) Sheekh Axmed ( Isaxaaq H.Yoonis),
(9) Maxamuud Cilmi Cawl ( H.Yoonis),
(10) Cumar Hadraawi (H.Yoonis),
(11) Caaqil Maxamed Xaruuri ( Sacad Muuse).
* Labadda oday ee ugu dambeeya, ee Cumar Hadraawi iyo Caaqil Maxamed Xaruuri, way xanuun-sanayeen, oo way u socon waayeen, sidaas awgeed way ka tageen, oo waxay dib ugu noqdeen Mandheera, sababta ay uga tageena waxay ahayd, iyaga oo aan gaadiid haysan ee ay dhuumaalaysi ku baxayeen, oo aanay qaadi karayn, wadooyinkiina la wadda xidhay, waxayna ka baqeen in lagu soo gaadho inta ay luudinayaan, sidaa ayeyna iyagoo sagaalkii kale wada uga gudbaan xadka. Halkaas oo ay dhamaantood ku nabad galeen, sagaalkii nin iyo ciidankii soo furtayba. Iyaga oo is qaybiyey, oo qaarba meel ka baxeen, waayo waxay ogaayeen in haddii meel lagu wada qabto, in la wada dili doono, waxayna sidaa u yeeleen, si qaar uun u badbaadaan, hadiiba qaarkood cadowgu helo. Waxayna arintaasi ahayd taatiko ciidan ama farsamo ciidan, ilayn waa la is yaqaanaaye, oo nin waliba wuxu yahay waa laga wada dheregsanaaye.
* Marxaladda labaadna waa tan aynu ka hadlayno, ee murugada leh, taas oo ahayd 17/10/1983-kii, markii uu shahiidku ( Alleh ha u naxariisto’e) uu weerar ku qaaday ciidamo uu qalab-koodu u dhan yahay, meesha la yidhaaho Burco-Duurey (agagaarka Lebi-sagaale), halkaas oo markii uu ku dhex dhacy ciidankii deganaa, ay saddex goor isu bedeleen ciidamo Faqash ahi.

Nasiib daro markii cid u soo gurmata la waayey ciidankaa yar ee uu watay, oo la sheegay in aanay boqol dhamayn, tayo ahaana laga heer sareeyey (dhanka hubka), mudo maalin iyo badh ah (36 saacadood ah) markii dagaalkii socday, gurmadkii afraad qaylo-dhaan dirtay, baa lagu wareegay, oo la isku xayn-daabay ama xeeray, halkaa oo uu marxuumku ILLAAH sw denbigiisa ha dhaafo’e, tii Alleh ugu timi oo uu ku xijaabatay ( muu dhimane),
Lixle wuxu ahaa nin rag ka tegay, dagaal yahan ah, wuxu isku rakibay oo dib u habeeyey hubkii S.N.M oo qaar uu ka bedelay dhuunta, wuxuu caan ku ahaa in uu hubka uu gacanta cadawga ku jira kala soo baxay, oo weliba ku dilo iyaga, inta uu xoog kaga maroorsado, wuxu ahaa nin aan la quudhayn ILLAAH sw ha u naxariisto’e. Isaga iyo intii inaga shahiidayba u soo duceeya in ILLAAH sw uu denbigoodda dhaafo -Aamiin.
Ugu dambayn waxaan ku so xidhay maqaalkan, ummadu waa in ay ogaataa wixii dalkan loo soo maray, iyo in hor-yaal-koodii ku dhamaaday, oo ay kala saaraan, is eryadka xusbayada ay xukunka ku kala doonayaan, iyo qaranimada Somaliland ee guud, isaga ( waa Lixle’e), iyo intii kale ee inoo soo shahiidayba, ILLAAH sw abaalkii ay inoo galeen khayrkiisa ha siiyo, ee u duceeya in ILLAAHEY denbi wixii ay lahaayeen ka dhaafo, oo janadiisa ka waraabiyo.

Waxaan kaga baxay Rabbi cududaha ha jebiyo cadawga Somaliland, iyo ka khiyaamada kula dhex jiraba, qabiiliistaha ah (cadaalad xumo ku taageera qabiilkiisa), ummadda kala gura, kursi doonka aan naf inoo hayn ee magac doonka ah, ka eexda wada ee nin jacaylka ku taageeraaya mid ay si xigaan, xididnimo, qaraabo, reernimo, hunguri doon, dantii maraate iyo wax allaale wixii hantidda ummadu ka bakhtiday gaarka u leexsaday, doonaaya in uu iskii jeebka ugu rito iyo inta ku garab taaganba ( uma jeedo cid gaar ah, ee waa dhamaan ilaa intii dib loo xoreeyey Samliland, wixii ku kacay arimahan iyo weliba kuwa ku kici doona ee soo socdda, nin kaste oo ay saamayso-ba, mid hore, mid jooga iyo mid damabe-ba, kii isku salaxaana isagaa is sheegay ee ha lau ogaado).
Ogaysiis,
Waxan ka codsanayaa Ummadda Reer Somaliland, meel ay joogaan-ba, cid alaale cidii haysaa, sooyaalkii ama taariikhddii Ilaah Naxariistiisa ha siiyo’e, Mujaahidkii Weynaa Ee Maxamed Cali, oo ah halkii uu ku dhashay, Dugsiyaddii uu wax ka bartay, wakhtiyaddii uu bartay aqoonta ciidan, sidda la sheegaayo isaga oo ka mid ahaa Jabhadahii Falstiin, iyo wakhtiyadda uu ka dagaalami jiray, goortuu ku soo wareegay Jabhaddii S.N.M, goobihii uu weerarka ku qaaday ee uu ka mid ahaa iyo gaar ahaan marxaladaha isaga loo tiriyo, sidda kuwan sare ee Mujaahid lixle ku cayiman, meeshii uu ku Xijaabtay ee tii alle ugu timi, iyo maalmaha ay goob waliba ahayd, iyo tii uu inaga dhuuntay, iyo maalinta ay ayhayd markii uu xijaabtay ( ilaah abaalkiisa ha siiyo uu inoo galye).
Fiiro-Gaar ah:- Ma jirto Oodweynenews.Com, lacag ay ku bixinaysaa soo sheegista taariikhahan aan idinka dalbanay, sababta aan u idhi waxa weeye, dad badan oo aanu waydiinay Ururinta arimahan Mujaahidiintii waaweynayd, oo yidhi naga iibsadda, Oodweynenews wuxu ku shaqeeyaa Mutadawacnimo ah in aanay lumin Taariikhaha aadka u xasuusta lihi sida tan mujaahid Lixle.
Waxa kale oo aanu ka wadda hadalay, isna fahanay Mujaahid Axmed Mire, oo imika ku sugan London ,is lana falan-qaynay arimaha mujaahid-nimadiisa, isaga oo ah mujaahidkii watay ciidankii galay Burco 27/05/1988kii. illaa Ceerigaabona, iyo meel kasta oo Somaliland ah ku dabar gooyey Faqshtii, ilko raarane, Waxan sidoo kale, si naxariis leh uga codsanaynaa Mujaahid Dhegaweyne in uu si degdeg ah ula soo xidhiidho Oodweynenews.com, gaar ahaan Abdirahman Jama Ahmed ( Abdi-shotaly), isaga oo u soo maraaya, kuna soo hagaaji-naaya sidatan hoos ku qoran:-
ashotaly@gmail.com,
Ama
webmaster@oodweynenews.com.
Waxan rabnaa in aan ka waraysano Taariikhdiisii, waayo waxay ahaayeen labadan mujaahiid, raggii hor moodka ka ahaa Is miidaamintii 27/08/1988kii ee Burco iyo sadex cisho dabadeed oo ahayd Hargaysa, markii la isku soo shubay Burco Iyo Hargaysa, sid aan hadhaw loo doon-doonin, ee iyaka oo xay ah aanu uga qorno xogta ay hayaan,
Wa Bilaahi Tawfiiq.
Somaliland Ha noolaato.
* N.B Wixii Aad Muraadaba, Macbuud Kuugu Roonaa!!
Abdirahman Jama Ahmed (Abdi-Shotaly),
U gaar ah Oodweynenews.com.