Munaasibadda lagu daahfurayey mashruuca horumarinta dekeda Berbera ee DP World Berbera oo lagu qabtay gudaha dekedda weyn ee dekedda Berbera, ayaa waxa hadallo ku saabsan muhiimadda uu maalgashigu u leeyahay dalka Jamhuuriyadda Somaliland ka jeediyey agaasimaha guud, ahna guddoomiyaha shirkadda DPWorld Md. Suldan Axmed Bin Sulayman, waxana uu shaaca ka qaaday inuu ku rajo weyn yahay in dib u habaynta iyo casriyeynta lagu samayn doono Dekedda Berbera door laxaad leh ka qaadan doonto dhaqaalaha waddanka iyo weliba soo jiidashada bucshurudaha kala duwan ee dunida, isaga oo madaxweynahana Iyo Xukumadiisa uga mahadnaqay sida uu ugu dhiirradeen go’aanka maalgashiga loogu samaynayo dekedda Berbera.
Wasiirka arrimaha dibadda Somaliland Dr. Sacad Cali Shire, ayaa isaguna hoosta ka xarriiqay sida ay Somaliland uga go’an tahay inay soo jiidato maalgashadayaal caalami ah, isla markaana mashruuca DP World Berbera uu yahay tallaabo horumarineed oo ay xukuumadda KULMIYE qaadday.
Madaxweynaha Jamhuuriyadda Somaliland Md. Axmed Maxamed Maxamuud Siilaanyo oo mashruucan si rasmi ah u furay, ayaa u mahadnaqay shirkadda DP World iyo dowlada imaraatkaadka , isaga oo tilmaamay inuu mar walba maanka ku hayo sidii mashaariic waa weyn oo maalgelineed dalka looga hirgelin lahaa, isla markaan uu soo dhaweynayo fursad kasta oo danta dalka iyo dadkuba ku jirto.
Dekedda Berbera, ayaa ku biiraysa dekedo badan oo adduunka kamid ah, kuwaas oo ay si rasmi ah u maamusho shirkadda reer Imaaraad ee DP World, waxana horumarin ballaadhan lagu samayn doonaa marsada caalamiga ah ee Berbera.
