Taariikh: 26/02/2018
Tixraac: SSE/DK 071/26022018
Daladda SSE talo ahaan sida ay u aragto wadahadalada Somaliland iyo Somaliya
Sida aydin la wada soctaan waxaa dhawaan mar kale dib uga bilaabmaya dalka Jabuuti wadahadaladii mudada dheer u socday J. Somaliland iyo Somaliya ee fashilmey isla iyo markaana aan habayaraatee waxba ka hirgelin ugu danbeyntiina ku xidhmey najiito la’aan , hadaba iyada oo aan 6 dii qodab ee ugu danbeeyey ee Jabuuti lagu kala saxeexdey oo koobsananeyey wadahadladii oo dhan isla iyo markaana ay saxeexeen labadii madaxweyne ee wakhtigaa M.M. Siilaanyo iyo Xasan Sheekh aan la fulin sidee ayey surtagal u tahay in wadahadal furmo mustaqbalkana laysu aamini karaa ! .
Wada-hadalada hore u qabsoomey
Waxaynu ogeyn markii la isugu yimid Shirkii caalamiga ahaa ee Somaliland ay kaga qayb gashay Magaalada London 23kii Febraayo sannadkii 2012kii, kaasoo Madaxweyne Axmed Maxamed Maxamuud Siilaanyo iyo wafdi uu hoggaaminayaa ay ka qayb galeen.Mid ka mid ah go’aanadii ka soo baxay shirkaa caalamiga ah ayaa ahaa in wada-hadal u bilaabmo Somaliland iyo Soomaaliya si looga wada hadlo arrinka ama qadiyadda Somaliland ay dib ula soo noqotey madax-banaanideedii iyo xidhiidhkooda mustaqbalka ..
Tan iyo wakhtigaa waxa qabsoomay shirar kala duwan, Saddex ka mid ah waxa ka qayb galey Madaxweynayaasha labada waddan, Waxa xusid mudan in kulankii ugu horreeyay ee lagu qabtey magaalada London 20-21 kiin June inuu ka duwanaa kulanadii ka dambeeyay. Ugu horreyn waxa kulankan soo qabanqaabiyey Wasaaradda Arrimaha Dibedda ee Ingiriiska oo ay wehelinayaan waddanka Norwey iyo ergey guud oo ka socdey EU. Waxa uu ahaa kulan culeyskiisa leh Dallada SSE waxay qabtaa dareen ah in kulankaa lagu lumiyey fursad dahabiya oo ina soo martey. Maadaam kulanka ay marti geliyeen labada waddan oo Yurub ah iyo ergey ka socda EU waxa khalad taariikhiya aheyd in ergadii ka socotey Somaliland ay ogolaatey markiiba in labada wafdi ay keligood ay arrimahooda wada xaajoodka ay iyagu dhammaysanayaan isla markaana aan loo baahneyn in cid weheliso. Waxa kale oo isna khalad taariikhiya ahaa in wada-hadaladii kaa ka dambeeyay uu waddanka Turkiga oo keliyi oo isugu ku keliyaystey oo abaabule iyo xidhiidhiyaba ka ahaa. Waxa la odhan karaa halkii ay markaa Somaliland is-dhigtey ayuunbaa lagula macaamilayay.
Dallada SSE iyada oo ka duuleysa duruufaha maanta ku xeeran ama ku gedaaman wada-hadalda hore u fashilmay ayaa waxa aanu ku talinaynaa:
1- In dib daraasad ay Somaliland ugu samayso dhammaan wada-hadaladii aynu soo marnay si mustaqbalka miiska loo soo dhigo sida ay Soomaaliya si badheedh ah u burburisay wada-haddaladaa.
2- In aan wax wada-hadal ah dib loo bilaabin ilaa iyo inta Soomaaliya ay ka waantoobayso ficilada fashiley wada-hadalkaa oo ay u horreyso khiyamada ku salaysan aynu wada-hadalno, isla markaana aan maalin kasta soo abaabulo wax ka dhan ah qaddiyada Somaliland iyo dareenka dadka reer Somaliland.
3- In haddii dib loo bilaabayo wax wada-hadal dambe ah in aan la ogolaanin in waddanka Turkiga , iyo wadamo kale aan dhexdhexad noqon karin oo keliya uun farsamo ahaan noqda wadahadalada, balse wixii dhexdhexaadin ah ee dambe laga codsado sidii bilwogii ay ku bilaabantahay waddamada kale ee arrimahan xog-xgogaalka u ahaa sida UK, Norway iyo EU.
4- In dowladda Somaliland ay xaqiiqdo waajahdo taasoo ah baahida mahuraanka ah ee loo qabo sidii loo heli lahaa wada-hadalo ku salaysan qorshayaal leh qaab hufan oo la raaco oo ay dhexdhexaadin iyo markhaati ka yihiin waddamada UK, Norwey iyo EU.
5- In dadka reer Somaliland mucaarid iyo muxaafidba gaar ahaan Golayaasha Qaranka iyo Axsaabtu ay arrinkan ka mideysnaadaan isla markaana xukuumadda lagu taageero inay mawqif adag oo bilaa naxariisa ay ka qaadato cid kasta oo baal marta.
Waxaa hubaal ah inta wadahadaladu socdaan ee aan lagu heshiin amaba lagu kala tagin in aaney dhici karin dawlad Somaliland ictiraafeysa oo ku dhexdhacaysa wadahadalo socda , sidaa daraadeed waxa haboon in wadahadaladu aaney noqon qaar jiitama ee lagu dhiirado lagana hadlo arimaha masiiriga ah isla iyo markaana la soo afjaro.
Gebogebo:
Dib u xaqiijinta Qaranimada Somaliland waa mid ku yimid halgan dheer oo qadhaadh iyo rabitaanka iyo codka shacabka mana aha mid u cuntamaysa wax ka hooseeya ama ka yar qaran madaxbannaan iyo in ay noqdaan laba dal oo jaar ah oo la kala yidhaa Somaliland iyo Somalia. Wax ama shay banii’aadam maanta adduunka ku hantiyo waxa ugu qaalisan waa xorriyad iyo madax-banaani , qaranka Somalilandna dad kumanyaal ah ayaa naftooda ku waayay. Kumanyaal kale oo jooga ayaa naafo jidheed iyo mid maskaxeedba maanta la nool.i. hadiiba’se wadahadalada dib loo bilaabayo waxaa haboon in wadahadaladu ka bilaabmaan lagana anba qaado halkii ay taagnaayeen iyo qodobadii ka soo baxay 21/12/2014 shirkii Jabuuti lana hirgeliyo wixii hore ee lagu heshiiyey.
Alle ayaa mahad leh,
Wixii faahfaahina kala soo xidhiidh:
Guddiga fulinta ee Dallada SSE
www.sseuro.com
Tel: +45 25 53 93 15
