Siyaasi Saleebaan Ciise Axmed (Saleebaan Xaglatoosiye), oo Xukuumaddii hore ee Axmed Siillaanyo ka soo qabtay xilalka Wasiirnimo ee Wasaaraddaha Dib u dejinta iyo Caafimaadka, ayaa ka hadlay tabashada saami-qaybsiga, iyo Xildhibaanada ka soo dareeray Golaha, waxaanu tilmaamay inay muhiim tahay in saami qaybsi la helo, balse maanta loo baahan yahay in doorashan lagu galo bilaa saami qaysi, islamarkaana qorshaha denbe laga darsado sidii arinta saami qaybsiga loogu salayn lahaa doorashooyinka denbe.
Siyaasi Saleebaan Xaglatoosiye oo arimahan ka hadlayay ayaa ugu horeyn hadalkiisa ku bilaabay “Waxaa muhiima ah si xeedhana xeedho u noqoto ilkana u nabad galaan in Doorashadan sidii hore lagu galo, oo Barlamaanka dambe ee imanaya iyo Guddida Doorashooyinka dambe ee imanaya ay sameeyaan sidii Doorashada dambe ee Barlamaanku loogu gali lahaa saami qaybsi”.
Xaglo toosiye oo hadalkiisa sii wata ayaa yidhi. “Aniguna ma diidani saami qaybsiga, oo waxaan leeyahay Beelaha darafyada iyo Beesha dhexe iyo guud ahaan Beelaha kala duwan ee Somaliland wada degaa xaq bay u leeyihiin inay helaan kuraastooda iyo saami-qaybsigooda, laakiin inta maanta la leeyahay saami-qaybsi ha la sameeyo, waxay ahayd in mar horeba laga sii baaran dego, oo hore looga sii tashado,Doorashada oo hadda saami-qaybsi lagu xidhaana dib u dhac iyo dhibaatooyin kale oo aynaan u baahnayn ayey inagu keenaysaa, ee taladdaydu waa dib ha loogu dhiga hadda tabashada saami-qaybsiga, oo si aanay Doorashadu dib inooga dhicin, oo qorshe ha laga sii yeesho Doorashooyinka dambe, oo Doorashooyinka dambe ha la inoo qabto Doorashooyin ku saleeysan saami-qaybsi”
GABILEY.NET
