Maxkamad ku taalla magaalada Lagos ee dalka Nigeria ayaa lagu wadaa inay dhageysto dacwad uu usoo gudbiyay qareen u dhashay dalkaas, kaas oo doonayo in bangiga dhexe ee Nigeria uu meesha ka saaro ereyada af carabiga ah ee ku qoran lacagta dalkaas.
Malcolm Omirhobo wuxuu sidoo kale doonayaa ereyada af carabiga ah laga saaro astaanta militeriga ee Nigeria oo lagu xardhay ereyo carabi ah.
Wuxuu ku doodayaa in arrintani ay muujineyso in Nigeria uu yahay dal muslim ah sidaas darteedna ay kasoo horjeeddo dastuurka dalka cilmaaniga ah.
Qareenka ayaa sidoo kale doonayaa in ereyada carabiga ah ee lagu dul qoray lacagta iyo astaanta militeriga loo baddalo ereyo Ingiriis ah ama saddexda luqadood ee inta badan looga hadlo Nigeria ee kala ah Hausa, Yoruba iyo Igbo.
Si kastaba, Bangiga Dhexe ee Nigeria wuxuu beeniyay in erayada carabiga ay yihiin kuwo muujinayo astaan gaar ah ama astaanta muslimiinta.
