Hargeisa(GNN):-Guddoomiye-ku-xigeenka kowaad ee KULMIYE Md. Maxamed Kaahin Axmed oo ay wehelinayeen Guddoomiye-ku-xigeenkiisa labaad Md. Axmed Cabdi Xuseen (Axmed Cabdi-dheere) iyo Xoghayaha Guud ee xisbiga Md. Xasan Siciid Yuusuf, ayaa ku booqday cusbitaalka guud ee Hargeysa xubno haldoorka Somaliland ka mid ah oo ay ka mid yihiin saxafiga ruug-caddaaga ah ee Xasan Maxamed Yuusuf iyo fannaanka Cabdinaasir Macallin Caydiid oo xannuuno u jiifa cusbitaalka guud, kuwaas oo xog-ogaal u noqdeen xaaladda ay xilligan ku sugan yihiin, isla markaana ay Alle uga baryeen inuu caafimaad buuxa oo degdeg ah siiyo.
Masuuliyiinta xisbiga KULMIYE waxa kaloo ay kormeereen goobo kala duwan oo ka mid ah cusbitaalka guud ee Hargeysa, kuwaas oo ay ka mid yihiin; Waaxda Korontada Cusbitaalka oo lagu qalabeeyey mishiinno casri ah, qaybta siffaynta kelyaha, Waadhka Carruurta lagula tacaalo iyo Waadh aad u ballaadhan oo loo dhisayo qaybta gargaarka degdega ee cusbitaalka, waxaanna warbixinno ka siiyey Agaasimaha guud ee Cusbitaalka oo ku wehelinayey kormeerka.
