Hargeysa, 15 Jeeniweri, 2017 (GNN) – Waxa Maalinba Maalinba ka dambaysay sare u sii kacaya Qiimaha Sarrifka Lacagta Qalaad ee Doollarka, kaasi oo saamayn weyn ku leh Qiimaha Maceeshadda.
Magaalooyinka Somaliland oo Bilihii u dambeeyay Boqolka Doollar lagu Sarrifayey inta u dhaxeysa 750 Kun oo Shilinka Somaliland ah iyo 780 kun, ayaa Toddobaadkii u dambeeyay Cirka isku sii shareeray, waxaana Shalay oo u dambeysay Boqolka Dollar lagugu beddelayey 810 kun oo Shilinka Somaliland ah, halka Boqolka Doollar lagu kala iibsanayey 835 kun oo Shilinka Somaliland.
Kor u kaca qiimaha Sarrifka Lacagta Dollarka oo illaa hadda aanay ka hadal Laamaha Dawladda Somaliland u qaabilsani, ayaa wuxuu si toos ah saamayn ugu leeyahay qiimaha maceeshadda Quutal-daruuriga ah, maaddaama oo Dadka Ganacsatada iibiya Raashinku ay iibka Raashinka ku qiimeeyaan Lacagta Doollarka, taasi oo ka dhigan ‘Haddii Qofku uu 75 kun oo Shilin ku iibsan jiray Haaf bariis ah inuu imika u baahan yahay Lacag intaasi ka badan’ maaddaama oo Qiimaha Raashinku la socdo Sarrifka doollarka.
Kor u kaca Qiimaha Sarrifka Dollarka, ayaa ku soo beegmaya Xilli ay inta badan Somaliland ka jiraan Abaaro baahsan oo sababay inay dabar go’aan Xoolihii Dadku ku noolaayeen, halka inta Gacmaha Dadka reer-guuraga ah ku soo hadhayna ay yihiin kuwo aad u Taag-daran oo aan iib-galeynin.
Dawladda Somaliland oo dhawaan ka hadashay Qiimo bararka Lacagta Doollarka iyo Maceeshadda Quutal-daruuriga, ayaa sheegtay “Sicir-bararka iyo Maceeshadda oo kolba kor u kacdaa waxay ka jirtay Guud ahaan Geeska Afrika.”ayuu yidhi, Wasiiru-dawladaha Wasaaradda Ganacsiga iyo Maalgashiga Somaliland Maxamuud Warsame Jaamac oo Toddobaadkii hore u warramay Telefiishanka Star.
Laakiin, haddaan Xukuumadda Somaliland iyo Baanka dhexe ka hor-tagin Sicirka Bararka doollarka waxa suurto-gal ah in Boqolka Doollar gaadho Hal Milyan oo Shilinka Somaliland ah, taasi oo ka dhigan inay Qiimo beesho Shilinka Somaliland.
