Washinton(GNN):-Madaxweyne Brack Obama oo bishii hore xilka ku wareejiyey
madaxweynaha bedelay ee Donald Trump ayaa waxa uu xilka ka tegey isaga
oo haysta hanti dhan 7 Milyan oo Dolar, iyo hal guri oo lacagtii uu ku iibsaday weli lagu leeyahay.
Gurigan oo ku yaalla Magaalada Chicago waxa uu Obama ka qaatay bangi,
waxa aanu heshiisku yahay in uu muddo 30 sano ah ku bixiyo lacagta
guriga oo la saaray dheef-kor dhan boqolkiiba 5.62 Dolar.
Warbixin maaliyadeed ka soo baxday Guriga Cad ee Mareykanka ayaa lagu
sheegay in madaxweynihii dhowaan xilkiisu dhammaaday ee Barack Obama iyo
xaaskiisa Michelle Obama ay haystaan hanti maaliyadeed oo lagu qiyaasay
inta u dhexeysa 1.8 Milyan illaa 7 Milyan oo Dolarka Mareykanka ah,
waxaana lacagtaas ku jira qiimaha guri keliya oo uu Obama leeyahay,
qiimihiisana lagu qiyaasay Hal Milyan oo Dolar.
Warbixin maaliyadeed ka hadlaysa haynta madaxweynaha xilka ka tegey oo
caado ahaan uu Guriga Cad soo saaro mar kasta oo uu madaxweyne xil ka
degeyo ayaa lagu sheegay in Obama Guriga uu leeyahay guri deyn ahaan
kaga qaatay mid ka mid ah bangiyada guryaha dhisa ee sii iibiya, waxaanu
gurigan deynsaday markii uu dhowr sano madaxweyne ka ahaa dalka
Mareykanka oo lagu tilmaamo in uu dhaqaalaha caalamka saddex meelood
meel gacanta ku hayo, isla markaana yahay dalka ugu dhaqaalaha badan dunida.
Warbixintan ayaa sida nidaamku yahay marka hore loo gudbiyey madaxweyne
Obama si uu u saxeexo kadibna la baahiyey, si hadhow haddii hanti intaas
ka duwani u soo baxdo isaga oo aan shaqo kale ama ilo dakhli oo kale
helin dib looga daba iman doono si loo weydiiyo sida ay ku dhacday.
Madaxweyne Obama oo sida muuqata ay ka dhaqaale badan yihiiin kumannaan
muwaadiniinta dalkiisa ah ayaa marka la eego hantidan yar ee uu haysto,
waxa uu ka mid noqonayaa liiska madaxda dunida ugu faqiirsanayd markii
ay xilka ka dageen.
Warbixintu waxa ay sheegtay in sanduuqa hawlgabka ee qofku marka uu
shaqada ka fariisto lacagta Bisilka loo yaqaanno laga siiyo ay Obama iyo
afadiisa ugu jirto lacag u dhexeysa 100 kun oo Dolar illaa 250 kun oo Dolar.
Warbixintan Guriga Cad kasoo baxday oo ka koobnayd Siddeed bog, waxaa
lagu sheegay in madaxweyne ku xigeenkii hore ee Mareykanka Joe Biden uu
haysto maaliyad u dhexeysa 120 Kun oo Dolar illaa 550 kun oo Dolar,
dhammaanteedna ah Naqad u yaalla Akoono bangiyo maalgashi, iyo caymisyo
kala duwan.
Barack Obama oo ah madaxweynihii 44-aad ee dalka Mareykanka, da’diisuna
55 sano jir tahay, waxa uu diiwaanka Mareykanka ee shaqaalaha heer
federaal ugu jiraa in uu yahay hawlgab, maadaama uu Siddeedii sano ee u
dambeeyey dalkiisa ugu soo shaqeeyey madaxweynenimo, waxaanu hawlgab
ahaan ku mutaysan doonaa in sannadka soo socda la siiyo lacag dhan 207.8
kun oo doolar, taas oo u dhiganta kala bar lacagtii musaharka
madaxweynenimo ee uu sannadkii qaadan jiray.
Obama iyo madaxweyne kasta oo xilku ka dhammaado dalka Mareykanka waxa
uu sidoo kale sharcigu u ogol yahay in toddoba bilood oo ka dambeeya
marka uu xilka ka dego, la siiyo adeegyo lagu magacaabo adeegyada
xilliga kala guurka oo looga jeedo in madaxweynaha xilka ka dega la
garab istaago oo adeegyo kaalmo ah la siiyo inta uu nolosha
muwaadinnimada caadiga ah la qabsanayo.
Dhinaca kalana maadaama uu madaxweynaha Maraykan dastuur ahaan yahay
taliyaha guud ee ciidamada qalabka sida waxa uu xeerka ciidamada
hawlgabka ah ku helayaa xuquuq kale oo ka duwan kuwa uu madaxweynenimada
ku helayo, waxaana ka mid ah in marka uu xilka ka tago, inta noloshiisa
ka hartay la siiyo adeeg amni iyo ilaaliyeyaal gaar ah, sidoo kale waxaa
la siinayaa caawimo maaliyadeed oo ah dhinaca safarrada, xafiiska uu
samaysto kharashka ku baxaya, kharashka isgaarsiinta, iyo kharashka caafimaadkiisa ku baxaya.
