Gudoomiyaha golaha wakiilada Somaliland Cabdiraxmaan Maxamed Cabdilaahi “Cirro” oo muddo 12 sano ah hayay xilka gudoomiyaha wakiilada Somaliland ayaa hadda si rasmi ah ugu dhawaaqay inuu iska casilay xilka gudoomiyaha golaha wakiilada Somaliland.
Gudoomiye Cirro ayaa mudanayaasha hortaada waxa uu ka akhriyey taariikhdii kala gadisanaa ee goluhu soo maray mudadii 12-ka sanadood ah,carqaladihii lasoo gudboonaaday golaha ee ay xaliyeen,waxqabadkii uu qabtay goluhu intii uu xilka hayay,xeerarkii uu goluhu ansixiyey iyo qodobo kala duwan oo xasaasi ah.
Sidoo kalena gudoomiye Cirro waxa uu xildhibaanada golaha wakiilada Somaliland u jeediyey dardaaran dhinacyo badan taabanaya,isaga oo ku adkeeyey in xildhibaanadu ay ilaaliyaan xasaanadda ay leeyihiin isla markaana iska cafiyaan wax kaste oo soo kala dhex galay,isaga oo sidoo kalena ku adkeeyey in ay meel adag ka taagnaadaan xilka ay Qaranka u hayaan mudanayaashu.
Waxaana xildhibaanada soo xaadiray ay tiradoodu dhamayd 71 xildhibaan,waxaana cod gacan taaga ku ansixiyey in ay ku raacsan yihiin iscasilaada Cirro 70 mudane,gudoomiyuhuna muu codayn,waxaana sidaasi uu gudoomiye Cirro kaga dagay xilka gudoomiyihii wakiilada Somaliland.
Kalfadhiigi xasaasiga ahaa ee xildhibaanadu saaka iskugu yimaadeen ayaa hadda kasoo dhamaatay xarunta Baarlamaanka Somaliland,waxaana la filayaa in maalinka Axadda ay xildhibaanada golaha wakiiladu doortaan mudanihii buuxin lahaa booska gudoomiye Cirro baneeyey.sidoo kalena waxa isna xilka uu hayo iska casilaya ku xigeenka kowaad ee gudoomiyaha wakiilada Somaliland Baashe Maxamed Faarax.
