Hargeysa(GNN):-Qaar ka mid ah xisbiyada siyaasada ee somaliland ayaa mudooyinkii ugu dambeeyey caydhiyey qaar ka mid ah masuuliyiinta xisbiga iyo xubno ka tirsan golaha dhexe.
Xisbiga Kulmiye ayaa laga caydhiyey xubno door ah oo ka tirsanaa golaha dhexe, halka xisbiga Ucid laga eryey gudoomiye ku xigeenkii koowaad ee xisbigaasi, talaabooyinkaas oo shacabku ay dareeno kala duwan ka bixiyeen.
Hadaba waxa xusid mudan in lays waydiiyo xeerka fasaxaya in xisbiyada laga caydhiyo siyaasiyiinta ka afkaar duwanaada hogaanka xisbiga, waxaana su,aashaas Hadhwanaagnews uga jawaabay siyaasi Cabdiraxmaan Cadami.
Siyaasi Cabdiraxmaan Cadami waxa uu soo bandhigay xeerka ogolaanayaa talaabooyinka ay
xisbiyada Kulmiye iyo Ucid qaadeen iyo cidii ka dambaysay in la hir geliyo qodobadaas ogolaanaya, waxaanu hadalkiisa ku bilaabay ““Xeerka la yidhaa Xeer Lr 14 ee doorashada ayaa wax ka badal lagu sameeyey, xeerkaasna waxa laga saaray laba qodob oo muhiim ah kuwaas oo kala ah
- in qofka xisbigiisa ka rayi duwaanada inaan lagu ciqaabi Karin in xisbiga laga eryo.
- xubinta golaha wakiilada ama deegaanka soo gashay ee ku soo baxday magaca sadexda xisbi mid ka mid ah ee ku soo baxay qorshihii, ololihii,magacii, dhaqaalihii iyo taageerayaashii xisbiga hadii uu damco inuu xisbiga ka baxo oo uu xisbi kale u diga rogto xubinimadii wuu dhigayaa oo wixii uu xisbiga ku helay wuu ka tagayaa qof kale ayaana xisbiga u soo galaya, labadaas qodobna waa laga saaray xeerka doorashada ee xeer Lr 14.
Siyaasi Cabdiraxmaan Cadami oo hadalkiisa sii wata ayaa ka waramay dhitaabo ay sababaan cida xeerka u samaynaysa dalka waxaanu yidhi “Midbaa somaliland dhaqan u noqotay, xeer dejiyayaasha somaliland marka ay xeer samaynayaan waxay ku saleeyaan xaalad yar oo markaa taagan inay kaga gudbaan, xeerarkana waxa loo sameeyaa in loogu tala galo dadka dambe iyo sanado badan loogu tala galo, balse inaga nasiib darada ina haysataa waxa weeyaan in xeer dejiyayaasheenu marka ay xeer samaynayaan waxay ugu tala galaan in biriishyar ay kaga talaabaan taas macnaheedu waxa weeyaan barito xeerkii shaqayn maayo ileen xaalada maanta ayaad ku salaysee.”
Sidoo kale waxa uu soo bandhigay cida sababtay in la hir geliyo qodobada ku jira xeer Lr 14 ee ogolaanaya in xisbiyada laga caydhiyo siyaasiyiinta ka afkaar duwan hogaanka waxaanu yidhi “Waxa jirtay in gudoomiyihii hore ee baarlamaanka hadana ah gudoomiyaha xisbiga Waddani Cabdiraxmaan Maxamed Cabdilaahi(Cirro) iyo madaxweynihii wakhtigaas hore ee Axmed Maxamed Maxamuud(Siilaanyo) ayaa laba awr isku kacsaday oo dan u arkay in xeerka doorashada ee Xeer Lr 14 laga saaro labadaas qodob iyaga oo ku salaynaya ujeedo gaaban oo ay markaa lahaayeen, labadoodii midna maanta kursigii ma fadhiyo laakiin xeerkii way ka tageen oo waakaas shaqaynaya ee kolba nin masuul ah xisbi lagaga saarayo.”
GABILEY.NET
