Masar Oo ku Gacan-saydhay Baaqii Ahaa In la Baadho Maydkii Mursi.

Dowlada Masar ayaa ayaa ka hor timid baaqii Qaramada Midoobay ee ku aadanaa in baaritaan madax bannaan lagu sameeyo dhimashadii madaxweynihii hore ee Masar Maxamed Mursi, iyadoo baaqaas ku tilmaantay iskuday ay ku siyaasadaynayso arrintaas.

Wakaaladda wararka ee AFP ayaa ku warrantay in afhayeenka Wasaaradda Arrimha Dibadda uu Erayada ugu culus ku cambaareeyay talada ay soo jeedisay Qaramada Midoobay, wuxuuna ku adkaystay in Mursi uusan waxba eersanin, balse ay tiisa gashay.

Qoyskiisa ayaa wakhti dheer walaac ka muujinayay sida loogula dhaqmayay xasbiga, waxayna sheegeen in xukuumaddu ay ka diiday codsi ay u dirsadeen oo ahaa in lagu aaso deegaanka uu ku dhashay.

Hoggaamiyihii hore oo 67 jir ahaa ayaa Talaadadii la aasay, saacado ka dib markii uu ku miyir daboolmay maxkamad uu ka soo muuqday, isaga oo halkaas ku dhintay.

Mursi ayaa ahaa madaxweynihii ugu horreeyay ee si dimuqraadi ah loo doorto, balse xabsi ayuu ku jiray tan iyo markii uu miltarigu xukunka ka xayuubiyay sannadkii 2013.

GABILEY.NET

error: Content is protected !!