Hargeysa (GNN):- Waxa la filayaa inay Madaxweyne Biixi iyo madaxda mucaaradka ee Waddani iyo UCID u bilaabmaan wada hadalada ku saabsan qabsoomida doorashooyinka, kuwaas oo ay dhexdhexaadinayso beesha caalamku.
Guddoomiyaha xisbiga Waddani Cabdiraxmaan-cirro oo lala sugayay bilowga iyo heshiis laga gaadho wada hadalada ka dib markii uu Madaxweyne Biixi dalbaday inuu goob-joog noqdo ayaa shalay dalka soo gaadhay.
Waxa isna la filayaa inuu dalka soo gaadho ergayga Midowga Yurub danjire Nicolás Berlanga Martinez oo ahaa masuulka isu soo dhaweeyay madaxtooyada iyo xisbiyad mucaaradka.
Ergayga ayaa wata qorshe ah inay Madaxweynaha iyo mucaaradku kala saxeexdaan shan qodob oo suurtogelinaya in heshiis la gaadho si ay doorashada wakiiladu u qabsoonto.
Si kastaba ha ahaate, wada hadaladan ay beesha caalamku ku hawlantahay ayaa la saadaalinayaa inay noqon doonaan kuwa ugu dambeeya ee sababa inay siyaasiyiinta Somaliland heshiis kala saxeexdaan ka dib markii ay iyagu sidooda ugu heshiin waayeen arrimaha ku saabsan doorashada golaha wakiilada iyo qabsoomideeda iyo weliba qaddiyadda guddiga doorashada.
GABILEY.NET
