Maalqabeenka Mareykanka ee dunida ugu lacagta badan Bill Gates ayaa ku dhawaaqay inuu lacag deeq ah siinayo Hay’adda Caafimaadka Adduunka ee WHO, maalin kadib markii Madaxweynaha Mareykanka uu joojiyey lacagtii dowladda Mareykanka siin jiray Hay’addaasi.
War kasoo baxay Hay’adda Gates Foundation oo ay shaacisay xaaska Maalqabeen ee Melinda Gates ayaa lagu sheegay in lacag dheeraad ah oo gaareysa $150 Milyan oo Doolar ay siinayaan Hay’adda WHO si looga taageero dagaalka dunida kula jirto cudurka Coronavirus.
Bil Gates ayaa si weyn u cambaareeyay tallaabada uu ku dhaqaaqay Madaxweynaha Mareykanka Donald Trump ee inuu dhaqaalaha ka jaro WHO, wuxuuna arrintaasi ku tilmaamay inay tahay mid halis ah xilligan xaalad culus ka taagan tahay dunida ayna ku howlan tahay sidii loo xakameyn lahaa faafitaanka cudurka Covid-19.
Bill Gates ayaa sheegay in caalamka uu xilligan aad ugu baahan yahay shaqada WHO si aan hore loo arag, ayna tahay in shaqadeeda lagu garab istaago. Hay’adda Gates Foundation ayaa hore u siiyay WHO lacag dhan 100 Miyan, waxayna guud ahaan lacagta ay sanadkan siineyso hadda gaartay 250 Milyan oo doolar.
Agaasimaha Hay’adda Caafimaadka Adduunka Tedros Adhanom Ghebreyesus ayaa uga mahadceliyey Bill Gates iyo xaaskiisa lacagta dheeraadka ah ee ay ugu deeqeen Hay’adda WHO xilligan ku jirta xaalad adag oo looga jawaabayo cudurka Covid-19.
Arrintan ayaa jawaab u ah go’aankii Madaxweyne Trump ku weerarray Hay’adda Caafimaadka Adduunka oo si weyn dunida iyo gudaha Mareykanka looga cambaareeyay.
