ADDIS ABABA(GNN):- Tirada dhimashada Banaan-baxyadii iyo rabshadahii Qowmiyadeed ee ka dillaacay Ethiopia toddaabdkii lasoo dhaafay, kadib dilkii Loo geystay heesaa caan ahaa oo ka soo jeeday qowmiyadda Oromada, ayaa gaadhay 239, sida lagu sheegay tirokoob ay sameeyeen booliska.
Hachalu Hundessa, oo ahaa hees halyey iyo codkar u ahaa Oromada, oo isu arka inay yihiin dad la liiday, ayaa waxaa toogtay rag aan la garaneyn maalintii Isniinta ee toddobaadkii hore, taasoo sii hurisay xiisado qowmiyadeed oo halis gelinaya xaaladda kala-guurka dimuqraadiyadeed ee dalka.
Mudaaharaadyo ayaa ka qarxay caasimadda Addis Ababa iyo gobolka ku xeeran ee Oromia, oo ah halka ay ku badan yihiin qowmiyadda ugu tirada badan dalka ee Oromada, kuwaas oo mudo dheer dareemayey in dhaqaale ahaan iyo siyaasad ahaanba la Yassay.
Saraakiisha ayaa u sababeynaya dhimashada laba arrin oo isbiirsaday oo kala ah’ awood ay adeegsadeen ciidamada amniga iyo rabshadaha ka dhex dhaca qowmiyadaha.
Sababo la xidhiidha rabshado ka dhacay gobolka, sagaal sarkaal oo boolis ah, shan ka tirsan maleeshiyaadka iyo 215 qof oo rayid ah ayaa naftooda waayey, waxaa sidaas yidhi ku-simaha taliyaha booliska gobolka Oromia Mustafa Kedir oo telefishanka ka hadlay Arbacadii.
Booliska magaalada Addis Ababa ayaa markii hore tirada dhimashada ee caasimadda ku sheegay 10 qof, hase yeeshee, tiradaas ayaa iminka waxaa ku kordhay 166 qof oo dhintay Sabtidii.
Mustafa waxa kale oo uu sheegay inay jiraan “burburin ballaadhan iyo bililiqeysi loo gaystay hanti dowladeed iyo mid gaar loo leeyahay.
Si loo xakameeyo rabshadahaan in ka badan 3,500 oo tuhmanayaal ah ayaa la qabtay. Waxay ahaayeen xubno ka soo horjeeda nabadda, kuwaasi oo fuliyey weerarro iyagoo qiil ka dhiganaya geerida heesaaga, si ay awood ugu burburiyaan nidaamka dastuuriga ah, ayuu yidhi Mustafa.
Ra’iisul Wasaare Abiy Ahmed ayaa sheegay in dilkii Hachalu iyo qalalaasihii xigay ay qayb ka ahaayeen shirqool xasillooni darro looga abuurayo Ethiopia.
