Manchester City ayaa cadhada guul-darradii Southampton kula dhacday Newcastle United, waxaanay ku karbaashtay 5-0.
City ayaa garoonkeeda Etihad Stadium waxay ku martigelisay Newcastle iyadoo kasii niyad-jabsan guul-darradii lama filaanka ahayd ee ay Axaddii kala kulantay Southampton, waxaana goolasha u furay Gabriel Jesus oo ciyaarta oo toban daqiiqadood oo kali ah socota goolka koowaad dhaliyey, ka hor intii aanu Riyad Mahrez daqiiqaddii 21aad 2-0 ka dhigin natiijada ciyaarta.
Qaybtii labaad ayay Manchester City hoggaanka sii dheeraysatay, waxaana gool iska dhaliyey difaaca Newcastle ee Federico Fernandez oo ciyaarta ka dhigay 3-0.
Manchester City oo aad uga awood badnayd Newcastle waxay la timid gool afraad oo qalbi-jabiyey ciyaartoyda Magpies, waxaana u saxeexay David Silva.
Garsooraha ciyaarta oo siidhiga dhamaadka afka ku haya ayay Manchester City la timid goolka shanaad ee ciyaarta oo uu dhaliyey Raheem Sterling oo kubbad ka helay David Silva.
