Madaxweynaha Mareykanka Donald Trump ayaa diiday inuu xaqiijiyo inuu si nabad uu xilka ku wareejin doono haddii laga guuleysto doorashada bisha Nofembar ka dhaceysa dalka Mareykanka.
“Hagaag, waa in dhammaanteen aan ka dhuursugnaa waxa dhici doonaa” ayuu yiri madaxweyne Donald Trump oo shir jaraa’id ku qabtay Aqalka Cad.
Wuxuu rumeysan yahay in natiijada doorashada ay ku dambeyn doonto gacanta maxkamada ugu sarreyso dalkaas xilli uu shaki ka muujinayo codeynta dhanka boostada.
Wuxuu ku jawaabay “Waxaan si weyn cabasho uga qabaa qaabka codeynta”
“Meesha halaga saaro qaabkan codeynta ah- marka waxay u dhaceysa si nabad ah- mana jiri doonto xil wareejin, waxaa jiri doonaa is qabqabsi”
Madaxweyne Trump ayaa ku andacoonayaa in codeynta qaabka boostada uu halis u yahay in wax lais daba mariyo.
Dhanka kale Joe Biden oo ah ninka la tartamaya Trump oo weriyeyaasha kula hadlayay magaalada Delaware wuxuu ku tilmaamay hadalka kasoo baxay Trump “Mid aan macquul aheyn”.
Koox ka tirsan Dimuqraadiga waxay sheegeen in Mareykanka ay ka jirto dowlad Aqalka Cad ka saari karto kuwo ku hamiya inay si sharci darro ku sii joogaan.
Haddaba haddii Trump uu diido in uu xilka wareejiyo maxaa dhici kara?
Barbara McQuade oo horay usoo noqday xeer ilaaliyaha Michigan, haddana ah macallin culluunta sharciga ka bara jaamacadda Michigan ayaa wargeyska The Atlantic ee kasoo baxa dalka Mareykanka u sheegay in haddii madaxweyne Trump uu ku adkeysto in uu xafiiska sii joogo marka uu dhammaado muddo xileedkiisa, laamaha ammaanka ay ka shaqeyn doonaan sidii xafiiska looga saari lahaa.
“Madaxweyne Trump waxaa uu markiiba luminayaa awoodda uu siinayo dastuurka dalka Mareykanka maadaam uu dhammaaday muddo xileedkiisa”, ayuu yiri Barbara.
Qaar kamid ah warbaahinta maxalliga ee Mareykanka ayaa kusoo warramay in haddii madaxweynaha uu dhamaado muddo xileedkiisa ama xilka laga qaado balse uu ku adkeysto in uu xafiiska sii joogo uu weynaya awoodda uu ku amro ilaalada madaxweynaha ama dhammaan ciidamada Mareykanka ee ka amar qaata.
Maadaama madaxweyne Trump uu yahay taliyaha guud ee ciidamada Mareykanka, waxaa sidoo kale meesha ka baxaya awoodda amar-siinta ciidamada Mareykanka.
Madaxweyne Trump oo markaas noqon doono muwaadin caadi ah ah ayaa waxaa meesha ka baxaya xasaanadii uu lahaa ee ahayd in aanan wax dacwad ah lagu soo oogi karin inta uu xilka hayo, waxaana dhici karta in la xiro, laguna soo oogo dacwad ah in uu si sharci darro ah ku joogay xafiiska.
Inkastoo madaxweyne walba oo Mareykan ah marka uu xilka ka dego xaq u leeyahay in la siiyo ilaalada madaxweynaha ee loo yaqaano Secret Service, haddana taas kama hor-istaageyso in xafiiska laga saaro.
Halkee loo laaban haddii natiijada doorashada lagu murmo?
Marka la eego sooyaalka taariikheed ee Mareykanka, natiijada doorashada madaxtinimada Mareykanka ma noqon karta mid dhibaato u horseedo Mareykanka, waana arrin naadir ah in lagu murmo.
Dastuurka Mareykanka waxaa uu dhigayaa in marka hore madaxweyne xil haya uusan awood u lahayn in doorasho uu ku tilmaamo mid aan waxba ka jirin, sidoo kalena walaac walba oo laga muujiyo doorashada, maamulada gobollada Mareyanka ee maamula guddiga doorashada ay awood u leeyihiin inay baaritana ku sameyaan haddiiba ay jirto eedeyn ah wax isdaba marin dhanka doorashada ah.
Waxaa adag ama naadir ah in marka baaritaan la sameeyo wax laga badelo natiijada doorashada, maadaam marka horeba ay adag tahay in la sameeyo wax isadab marin dhanka doorashada Mareykanka ah.
Tallaabada kale ee u bannaan musharixiinta doorashada haddii lagu murmo doorashada ayaa waxay tahay in dacwadooda ay u gudbiyaan maxkamadda ugu sareysa Mareykanka, maxkamadaas oo in ay waxba kama jiraan kasoo qaado doorashada u baahnaan doonta caddeymo adag.
