Ergada codadka oo si rasmi ah Joe Biden ugu doortay madaxweyne

Ergo codeedka Mareykanka ee loo yaqaan Electoral College ayaa Isniintii u doortay Joe Biden inuu noqdo madaxweynaha Mareykanka isaga oo helay 306 cod, halka madaxweyne Trump uu ka helay 232 cod.

Biden ayaa si waafi ah uga sare maray tirada uu u baahnaa oo aheyd 270.

Tirada 306-ka ah ee Biden uu helay ayaa la mid ah tii uu afar sano kahor helay madaaxweyne Donald Trump, markii uu ka adkaaday musharaxii Dimoqraadiga Hillary Clinton.

Madaxweynaha Mareykanka ayaa waxaa doorta ergo loo yaqaan Electoral College, kuwaasi oo shacabka ay kusoo doorteen doorashadii madaxweyne ee dhacday 3-dii November.

Tartanka madaxtininimo ee Mareykanka ayaan dhameystirneyn illaa ay ergadan doorasho oo laga soo xulay dhammaan 50-ka gobol ee dalka ay kulmaan, si ay codkooda u dhiibtaan, taasi oo shalay dhacday.

Codeynta shalay ayaa timid ayada madaxweyne Donald Trump uu weli sii wado in uu dafiro natiijooyinka doorashada, islamarkaana uu diidan yahay inuu aqbalo in lagha guuleystay.

Isaga oo hadlayey kadib guushiisa ayaa Biden waxa uu yiri “Dagaalka loogu jiro ruuxda Mareykanka, dimoqraadiyadda ayaa guuleysatay.”

Madaxweynaha la doortay ayaa isaga oo ku boorinaya dadka Mareykanka “inay midoobaan, oo ay bogsadaan,” waxa uu markii ugu horreysay si xooggan u cambaareeyey isku dayga ay madaxweyne Donald Trump iyo xulafadiisa ku doonayaan inay ka beddelaan natiijada doorashada, taasi oo uu ku macneeyey “dagaal aan horey loo arag oo lagu qaaday dimoqraadiyaddeena.”

Xitaa ku xadgudubka awoodda ma joojin karto xukunka oo si n nabdoon loogu kala wareego, ayuu yiri Biden.

error: Content is protected !!