Hargeisa(GNN):-Abaaro iyo biyo la’aan ayaa ku soo noq noqda dalalka Geeska Afrika, sannadkasta oo uu roobku yaraado ama ay ka dib dhacaan xilligii la filayay in roobabka Gu’gu curtain waxaa dhibaato soo gaadha dad badan oo xoola dhaqato iyo beeraley isugu jira, maadama quudka dadka iyo calafka xooluhuba ku xidhan yahay roobka.
Sannadkasta waxaa barakaca dad hor leh, sannadihii 2016-kii ilaa 2017-kii abaar aad u daran ayaa ka dhacday gobollada Somaliland, waxay galaafatay malaayin neef oo xoolaha kala duwan isugu jira, dad badan ayaana abaarahaasi ku caydhoobay waxaa qaar badani ay galeen xeryaha barakacayaasha, halka kuwa kalena ay bilaabeen dhuxulaysi iyo jarista dhirta intii ka hadhay abaarihii dad iyo duunyaba xaalufisay.
Haddaba sannadkii 2018-kii ayay wasaaradda horumarinta beeraha Somaliland bilowday mashruuc kor loogu qaadayo wax-soo-saarka beeraha iyada oo beero laga hirgelinayo degaano hore xoola dhaqato u ahaa oo aanay beero hore uga jirin.
Waxaana sidan lagu sheegay barnaamijka Bandhigga idaacada VOA, laanteeda afka Soomaaliga.
Jamaal Xuseen Daahir, wuxuu ka mid ahaa dadkii abaaraha ku caydhoobay ee bilaabay dhuxulaysiga balse haatan waa beeraylay ka faa’idaystay mashruuc lixdan qoys oo degaanada koonfur kaga began magaalada Hargeysa looga sameeyay beeraha dedan ama casriga ah.“Annagu markayagii hore waxaa aanu ahaan jirnay xoola dhaqato, deetana abaaro ayaa dhacay, xoolihiina waa ay dhammaadeen, intaasi kadibna waxaa aanu bilownay in aanu dhirta garaacno annaga oo dhirta jarayna, ayaa ILLAAHEY noo keenay hay’add GIZ la yidhaaho iyo wasaaradda horumarinta beeraha Somaliland oo wada socda.
Intaas kadib waxaa ay na bareen nidaamkii dhulka wax loogala soo bixilahaa, iskaashatooyin ayaa la abuuray, waanu ka faa’idaysanay, marka waxaanu ogaanay in wax-soo-saarka dhulku ka faa’ido badan yahay in dhirta la jaro oo dhuxul laga dhigo, marka sidaasi darteed imika wax kasta waanu beeranaa”
Agaasimaha guud ee wasaaradda horumarinta beeraha Somaliland, mudane Rooble Cabdi Muuse, ayaa ka waramay mashruuca beeraha dadan iyo wax-soo-saarka kor loo qaaday “Waa mashaariic qorshahoodu tahay horumarin, iyo sidii ay Somaliland u gaadhi laheyd isku filaansho xagga cuntada iyo wax-soo-saarka ah, iyada oo la horumarinaayo beeraha iyo wax-soo-saarka.
Haddii aad si kale u eegto abaarta iyo is baddelka cimiladda adduunka oo dhan ayuu ka jira, balse, abaar cid ay wax yeeshay oo ka cabata waa waddamada soo koraya, marka sida looga jawaabaya in ay noqoto si seeska u dhigta, si heerka nugul ee beerayleyda hoos loo dhigo, horumarna lagu talaabsado, islamarkaana aan laga jawaabin oo kaliya xaaladii abaarta ka dhalatay oo kaliya, in ay beeraleydu hesho abuur u adkeysan karaa roobka yaraanaya, in beeraleydu hesho hab iyo xirfad aqooneed oo ay ku isticaali karaan biyaha roobka iyo dhibicda da’aysa oo kaliya ee biyihii inta ay qabsadaan ay dhibicdii iyagu maamulan karayaan.
Marka waxaa aanu aad u dhiirigelina in dadka laga wareejiyo beer roobaadka isla markaana loo wareejiyo waxaa loo yaqaano beer waraabka, iyo beeraha dadan”
