17.05.2022 Hambalyada Munaasabada Xuska 31aad ee 18ka May 2022
Waxannu halkan hambalyo ugu soo gudbinaynaa dhammaan ummadda reer Somaliland gude iyo dibedba munaasabadda xuska 18 May ee sanadguurada 31aad ee ka soo wareegtey dib ula soo noqoshadii qaranimada Somaliland.
Waxaananu ilaahay ka baryeynaa in uu sanadkan sanadkiisa inagu gaadhsiiyo bashbash, barwaaqo, nabad iyo xasilooni, isla markaana Somaliland aduunka ka hesho ictiraaf buuxa .
- 18 May waa maalin ku qaali ah ummadda reer Somaliland maadaama ay tahay maalintii la go’aansaday in dib loola soo noqdo xornimadii iyo qaranimadii Somaliland.
- waa maalin ina xasuusinaysa halgankii adkaa ee loo soo maray dalkan in dib loo hantiyo qaranimadii inaga luntay 1dii July 1960kii.
- waa maalin kulmisay isla markaana walaalaysay shacbiweynaha reer Somaliland oo maanta halgan ugu wada jira sidii waddanku u heli lahaa aqoonsi caalami ah.
- waa maalin ku weyn taariikhda cusub ee Somaliland, waana waajib in dhallaankeenna aynu ku wacyi gelinno qiimaha iyo qaddarinta ay maalintani muddan tahay.
Tan iyo sannadkii 1991 oo ah markii aynu la soo noqonay xorriyadda Somaliland, waddanku wuxu soo maray maraaxil iyo xaalado noocyo badan, kuwaasoo lagaga soo gudbay isku duubni, wada-tashi, wada-shaqeyn iyo dulqaad aynu muujinnay muddadaa ama wakhtigaa intaa leeg.
Waxannu boogaadin u soo jeedinaynaa dhammaan Jaalliyadaha qurbo joogga reer Somaliland oo wakhti iyo juhdi badan geliyay sidii munaasabadan maalintan xuska 18 May 2022 ay u soo bandhigi lahaayeen barnaamijyo u qalma oo ay u noqon lahayd mid ka bilan sannadihii hore.
Gebagebadii:
Bulshada caalamka waxaannu cod dheer ugu sheegaynaa in danta caalamka, tan mandaqa iyo danta Somaliland iyo Somalia-ba ay ku jirto in (Somaliland iyo Somalia) ay noqdaan laba dal oo jaar ah, maadaama aanay sinaba suurta gal u ahayn inay mar dambe ku heshiiyaan dawlad ay wadaagaan. Sidaa daraadeed, Somaliland waxay beesha caalamka marti uga tahay aqoonsi buuxa.
Waxaannu mar labaad u hambalyeyneynaa bulshada Somaliland sannadguurada 31aad ee ka soo wareegtey dib ula soo noqoshadii qaranimada Somaliland annaga oo u rajeynayna barwaaqo iyo horumar. Ummadda Somaliland, waxaannu kula dardaarmaynaa wadajir, iskaashi iyo midnimo.
Wa Billaahi Tawfiiq
Somaliland Society in the Netherlands
E-mail: adam.32@live.nl
