’Ha ka fikirin shalaytoole. Ka fikir berrritoole. Maxaa yeelay berrritoole waa fursad aad ku sixi kartid khaladaadkii shalay’’ Tabaabushe badan baa xaafada ka socday. Dumarkunna waxay diyaarinaayeen cunto noocyo badan. Guriga waxaa ka socotay qurxin iyo bedalid allaabta iyo midabayntiisa ah. Hablaha waxaa loo diray inay hagaajiyaan qol gaar ah oo la dhigo sariir, miis, kursi, kattabaan iyo kabadh buugta lagu rito. Qolkaa waa la qurxiyay oo aroos cusub in lagu soo hoynaayo mooye wax kale ma moodid. Rajo ayaa guriga ceegaagtay.
Carruurtu waxay ogaysiiyeen asxaabtooda kale. Habluhunna jaarka ayay u sheegeen. Hooyada qoyskunna sidoo kale. Aabbuhunna, odayaasha kale ayuu ugu faani jirayba inuu imika ku nasan doono wiilkiisa oo waxbarasho soo dhammaystay, dalkanna dib ugu soo noqon doona. Afaafka hore ee guriga waxaa lagu xardhay ‘’ Ku soo dhawaw qoys kugu rajo weyn’’. Gegida diyaarada waxaa soo caga dhigatay diyaaradii siday Guleed. Suudh madaw, nigtay cas iyo boorso madow oo laabtob ku jiro ayuu aayar la soo lugeeyay. Aabbo Abdilaahi,
wuxuu ka kacay fadhiga. Arragtidii koowaad ee uu wiilkiisa arkayba waxaa indhihiisa ku soo istaagtay illin. Si kal iyo lab ah ayuu xabadka xabadka ugu geliyay, madaxana uga dhunkaday. Waxaa ku soo orday oo dhinacyada qabsaday saddex wiil oo ay walaalo yihiin. Soo dhawaw, soo dhawaw, waxaad noo tahay rajo iyo iftiin cusub oo qoyskeenna u soo baxay ayay ku lahaayeen.
Waxaa la geeyay gurigii. Albaabkaba waxaa ku diyaara hooyo iyo laba hablood. Markaliya ayaa lagu wadda dhagay. Qalbi jilicsanaa dumarkeennu. Illin ayaaba ka soo daatay hooyadii. Maxaa ku heleed la ooyaysaa? Aabihii baa waydiiyay. ‘Farxad baan la ooyaaya, Illaahay isha ha kaa xijaabo. Soo dhawaw hooyo, ku soo dhawaw carruurtiini iyo qoyskiinni oo kugu rajo weyn’ ayay hooyadii tidhi. Guleeed,waa wiil dhallinyaro ah. Siddeed sanno ka hor ayuu dalka ka amba baxay oo u waxbarasho dibadeed doontay. Wuxuu tagay oo ka daggay dal shisheeye. Bilowgii wuxuu ahaa wiil wanaagsan oo ku dadaala casharka jaammacadda, cibaadada iyo maalin maalin uu iska jimicsado, ciyaaro kubad ama orad sammeeyo. Sannadkii koowaad wuxuu ku dhammaystay si wanaagsan oo guul ah.
Saaxiibtinimadu, mar waxay kuu horseeda guul, garaad dheeri iyo qayrkaa oo aad ka hor martid marna waa guuldaro, garaad li’i, dib u socosho iyo nolol ka dhicid. Saaxiibka xunni waa halaaga noloshaada iyo higsiga mustaqbalkaaga. Guleed , wuxuu la saaxiibay dhallinyaro kale oo aan haysan jidkii iyo toobiyihii geyn lahaa dhammaystirka ujeeddada ay u tageen waddanka shisheeye. Saddexdii sanno ee hore markay u dhammadeen isagoon dhammaystirin takhususkiisii (bachelor degree) ayay xaafadii ku tidhi iska soo bax oo dalka ku soo noqo si uu shaqo u bilaabo. Qoyskoodu waxay u haysteen inuu dhammeeyay jaammacadda ma se oga inaanu dhammayn oo uu dariiq ka duwan ujeeddadii loo diray haysto. Waxaa loo sammeeyay shahaado macmal ah ( been ah). Xaafadiina wuxuu ku yidhi waxaan bilaabaya shahaadada labaad ee (master degree). Wuxuu ka cabsi qabay inuu ku noqdo qoyskoodii isagoo faro madhan. Loo soo dir lacagtii uu ku bilaabi lahaa halkuu marin jiray lacagtii hore. Way wanaagsan tahay inaad marmar is waydiiso waxaad qabanaysid iyo ficilada aad ku dhaqaaqaysid. Ardayga waxbarasho dibadeed helaa waa rajada qoyskiisa iyo qarankiisaba. Maalin walba oo dhaafta qoyskoodu kor bay u tirin jireen, maanta intaasa u hadhay iyo intaasa u dhimman.
Wakhtigii waxbarashadu wuxuu ka dhammaaday isagoo faro madhan. Siddeed sanno oo khasaare ah. Maalin walba waxaa tilifoon soo diraaya aabbihii, hooyadii, wallaalihii oo si wadda jir ah u leh goormaad soo baxaysaa waanu kuu xiisnaye. Wuxuu isku sii dhajiyaba markii danbe intuu sidiisii yeelay oo hagaajistay dhawr shahaado oo been abuur ah ayuu diyaarada lugta soo saaray. Dalkanna ka soo daggay. Shaqo halkuu ka keeni, aroortii ha ka laho. Duhurkiinna ha soo qado doonto. Galabtiina suuqa ha ku noqdo, habeenkiinna aabbihii ha ku yidhaa dalka waxba ma yaalan oo shaqo ma jirto. Niyada ha loo dhiso oo ha lagu yidhaa waad heli ee u samir. Sannad iyo badh markuu sidaas ahaa ee reerkunna yaaban yahay ayaa laysla meel dhigay in caadadii Soomaali hodday ee halaysay lagu shaqo geeyo. Aabbo Abdilaahi ayaa la hadlay dhawr nin oo shirkadaha waaweyn u shaqeeya oo ay asxaab dhaw yihiin, qaarna ehel isku yihiin. Looga soo dhammee shirkad inuu ka shaqo bilaabo. Ninkii warraysiga (Interviewga) ka qaadayay yaab oo waxaa isku qaban wayday shahaadada uu watto iyo maskaxda madhan ee uu warraysanaayo. Waa nin cid ka danbayse, toos loo gudbi loona shaqo geli. Cabasho is daba joog ah ayaa maalinwalba ka immanaysay. Maamulka sare ayay gaadhay. Shahaadooyinkiisii la hubi lana ogaa waxwalba oo jira. Ninkii geeyay shaqadana dhibaato kaga timid oo booskiisiibaba laga caydhin gaadhay. Cadhadii uu ka qaaday kula dul dhac aabbo Abdilaahi. Maxaad ii ceebaynaysaa? maad nin dhisan oo dadka wax la qaybsan kara ii keentid. Haddaanu waxba soo baran inaankaagu waad ogeyd ee maad ii sheegtid Meel asturan baan geyn lahaaye?. Waad i ceebayseen oo shaqadaydiina halis bay ku jirtaa. Inankaagu, wuxuu soo bartay ma jirto. Shahaadooyin beenuu wattaa oo aannu xaq u lahayn. Waa la soo eryay ee sidaas ula soco! Waxaa u bilaabmay qoomamo. Maxaad la hor tagi aabbahaa, hooyadaa iyo carruurtini kugu rajo weynayd. Ma khasaare ka weyn kan baa jira. Wuxuu dib u celiyay xusuustiisa. Maalintaas maad ka faa’iidaysatid iyo maalintaas maad wax qabsatid. Maalintaas maalayacni bay kugu dhaaftay iyo maalintaasi wax wanaagsan maad qaban. Goor aan goor ahayn uun buu dib isku xisaabiyay. Aabbo Abdilaahi, wuxuu qaaday niyad jab weyn. Da’diisu waa mid weyn oo aan awoodin inay sannado badan oo danbe u sii shaqayso qoyska. Isagoo aad u muruugaysan buu guriga galay oo hooya Caasha la waddaagay sheekadii ‘’ Waxaan is lahaa ha ku nasiyo, waxaan is lahaa ku naso, waxaan is lahaa ha ku badalo, waxaan is lahaa qoyska ha hogaamiyo. Waxaan is lahaa geedkaad beertay midhihiisa gooso. Waxaan is lahaa tartanka kaalinta horu ka geli. Waxaan is lahaa ubbadkoodu ha ku daydaan. Waxaan is lahaa wuu idin anfici. Waxaan is lahaa farxad iyo rayn rayn baa kuu soo socota. Waxaan is lahaa badhaadhe iyo barwaaqo ayaa kuu iman. Intaasiba waan waayay.
Dhallinyarada iga gaadhsii. U sheeg, in ay yihiin ubax u maqan dalkooda iyo dadkooda. Ubaxuna qurxiyo guryaha sidaas si la mida ah ay qurux u yihiin dalkooda iyo dadkooda. Waalidintii way idin ku han weyn yihiin. Way idiin hilloobeen intaad ka maqnaydeen. Waxay ku fikiraayan in uu soo noqdo wiil/gabadh wax soo bartay oo nolosha qoyskooda iyo qarankoodaba badala. Se ma sugaayan inuu soo noqdo qof aan waxba soo baran oo sannado badan lagu tabcaayay. Inaad waxbarasho dibadeed heshaa waa nasiib waxaa se nasiib daro ah inaad ka faa’iidaysan weydo!
Abdirahmaan Daahir Gurijoog .
Kalafilan@hotmail.com
Stockholm sweden .
