Bulshada S/land Ee Abaartu Ku Dhacday Waxay Tabayaan Gurmadkii Walaalnimo Ee Ay Ka Filayeen Madaxwaynaha Jamhuuriyada Jabuuti Ismaaciil Cumar Geel

Dhagxumooyinka Diiwaanada Taariikhda Ugu Qormaya Madaxwaynaha Jabuuti Ismaaciil Cumar Geele Haduu Ka Gaabsado Gurmadkii Walaalnimo Ee Xoolo Dhaqatada S/land  Ee Abaartu Ku Dhacday Ka Filayso

Waagii baryaaba waayo lehe  Mudo Bill ah ayaa laga joogaa maalintii Wafti Balaadhan uu horkacayo Wasiirka  Arimaha Gudaha Jabuuti si wayn loogu soo dhaweeyay Caasimada S/land iyadoo Waftiga Dalka Jabuuti ay la kulmeen Madaxwayne Siiraanyo iyo xubno Golaha Wasiirrada ka tirsan waqti Bulshada S/land ku jirto Xaalad Abaareed iyo Duruufo Nololeed oo adag oo lagu tilmaami karo Abaartii ugu Adkayd ee S/land ku dhacda  waxayna Bulshada S/land filayeen in Waftigaasi markuu Dalka Jabuuti ku noqdo in ay si qoto dheer warbixin uga siin doonaan Abaarta Ba”an ee Gobolada Bariga S/land ka jirta Madaxwaynaha Jamhuuriyada Jabuuti Ismaaciil Cumar Geele iyo Safiirada Beesha Caalamka ee ku sugan Dalka Jabuuti iyagoo Waftigu si qoto dheer uga waramaya Gurmadka Bani Aadminimo ee ay u baahan yihiin Bulshada Xoolo Dhaqatada S/land ee Abaartu ku dhacday iyagoo Dareen Walaalnimo iyo damqasho u muujinaya Bulshada S/land  oo Diin, Dhaqan iyo Wada Dhalasho soo jireen ah wadaaga Dhigooda Jamhuuriyada Jabuuti balse Nasiib darro taasi may dhicin walina Girmadkii Walaalnimo lagama hayo Xukuumada Madaxwayne Ismaaciil Cumar Geele  iyo Bulshada Jamhuuriyada Jabuuti.

Sidoo kale Waxay Taariikhdu ka marag kacaysaa in Bulshada S/land aanay u kala hadhin Gurmadka ay la garab joogsanayaan Dhigooda Bulshada Jamhuuriyada Jabuuti iyadoo Taariikhda ku xusan tahay Kaalintii Bulshada S/land ku lahayd Dhaqdhaqaaqii Xornimo Doonka ee Jamhuuriyada Jabuuti.

   Mar kale waxay Taariikhdu ka marag kacaysaa sidii Bulshada S/land Hiilka ula garab joogsadeen  Weerarkii Gardarada ahaa ee Dawlada Eratariya ku soo qaaday Dalka Jamhuuriyada Jabuuti iyadoo Xukuumada S/land Madax Dhaqmeedka  iyo Shacabka S/land ay Cod dheer ku sheegeen in aanu Dagaalku Jabuuti ku koobnaan doonin iyagoo Bulshada S/land ka qayb qaateen Gurmadkii Taakulada Ciidanka iyadoo Xoolo badan loo ururiyay la gaadhsiiyay Ciidamada Jamhuuriyada Jabuuti ( Tafo Rag Dharaarba Midbaa Qaawane )  inta  aynaan Dull joogsan Xaalada Dhabta ah ee ay ku sugan yihiin Bulshada Xoolo Dhaqatada ah ee S/land aynu iswaydiino Su”aashan Taariikh noocee ah ayaa ku qormaysa Madaxwaynaha Dalka Jabuuti Ismaaciil Cumar Geele hadii aanu Gurmadkii Walaalnimo u fidin Bulshada Xoolo Dhaqatada ah ee Abaartu ku dhacday ee S/land ?

Sidoo kale waxaa Diiwaanada Taariikhda Qarniyo iyo Sanado danbe lagu xusi doonaa Gurmadka Walaalnimo Taakulaynta iyo Niyad Samida ay ku qaabileen Shacabka Dawlada Deegaanka Soomaalida Itoobiya Dhamaan Xoolo Dhaqatadii u gudubtay Xuduudka Dawlada Deegaanka Soomaalida Itoobiya waana Taariikh lagu xusi doono Madaxwayne Cabdi Maxamuud Cumar iyo Xisbiga Dimuquraadiga Soomaalida Itoobiya .

Mar kale Waxaa xusid mudan in Xukuumada Taagta daran ee Muqdisho ay Sanad ka hor kaga qayb qaadatay Gurmadkii Muslinimo ee laga filayay iyadoo soo gaadhsiisay Xukuumada S/land Gargaar dhan 1000,000 oo Doolar.

Iyadoo Maalinba Maalinta ka danbaysa ay kordhayso Qaylo dhaanta Abaarta Saamaynta Badan ku yeelatay Guud ahaan Bulshada Xoolo Dhaqatada ah ee ku dhaqan Dalka S/land Bari iyo Galbeedba gaar ahaan Gobolada Bari S/land oo Abaartu soo Baro kicisay Kumanaan Qoys oo ka mida Danyarta Xoolo Dhaqatada ah oo Boqolaal Kiiloo Mittir ka soo hayaamay Deegaanadii ay daganaayeen ilaa Deegaanada Gobolada Galbeed S/land sida Gobolada Awdal iyo Gabiley oo Nolosha Xoolo Dhaqatada iyo Beerolaydu ay hore ugu jirtay Duruufo Nololeed oo lagu Tilmaami karo Burbur Dhaqan Dhaqaale oo ay ku reebeen Dagaaladii Sokeeye ee Dalka S/land ka dhacay Sannadihii Dabayaaqadii Sideetamaadkii ee Burburkii Dawladii Soomaaliya  iyadoo Bulshada Xoolo Dhaqatada ah ee ka soo Hayaantay Gobolada Bariga S/land ay tahay markii Koowaad ee ay arkaan Deegaanada Galbeedka S/land waxaa Layaab ku noqotay Dad hore u Caydhoobay ee Xeradooda Afar ilaa Laba Sac iyo Labaatanka Laxaad ku jiraan .

Inkasta oo Duruuftaa Nololeed ee Adag ku noolyihiin Bulshada S/land ee Gobolada Galbeedku waxay muujiyeen Gurmad Walaalnimo iyo in uu wali ka muuqdo Dhaqankii Suubanaa ee Soomaalida lagu yaqaanay waxayna Qoys Qoys uga qayb qaateen Gurmadkii loo fidinayay Bulshada Gobolada Bari ee Abaarta aadka u darani ku dhacday waxaana Deegaanada Gobolada Awdal iyo Gabiley laga raray Boqolaal Gaadiid ah oo Calafkii Xoolaha ah oo la gaadhsiiyay Deegaanada Gobolada Bari ee Abaartu ku dhacday .

Abaarta Magacyada badan loo bixiyay ee ku dhacday Bulshada S/land waxay Saamayn gaara ku yeelatay Gobolada Bari ee S/land  iyadoo Deegaanada Bariga S/land ay Warbaahintu si cad u baahisay Caruur iyo Waayeel Gaajo iyo Haraad ugu dhintay Gobolada Bariga S/land waxayna Bulshada S/land filaysay in Dhigooda Bulshada Jamhuuriyada Jabuuti ay Gurmad Walaalnimo la garab joogsadaan waxaase la yaab ku noqotay Bulshada S/land in Dhigooda Bulshada Jamhuuriyada Jabuuti ayna Fadhiga uga kicin oo ayna ka soo jawaabin.

Ugu danbayn waxay Bulshada S/land Baaq dheer ku sheegayaan  in ay tabayaan Gurmadkii Walaalnimo ee ay ka filayeen Dhigooda Bulshada Jamhuuriyada Jabuuti

   Qalinkii Abwaan Sacad X Maxamuud Gadhle Hargayasa S/land

error: Content is protected !!