Hargeisa(GNN):-Wargeyska Weyn Ee Dawan Oo ka Soo Baxa Caasimada Hargeisa Ayaa Cadadkiisii Saaka Soo Baxay Xagga Hore Soo Dhigay Warbixintan.
Shirkadda Isgaadhsiinta ee TELESOM, ayaa bilowday tallaabooyin ay ku carqaladeynayso go’aankii xukuumadda ee la xidhiidhay in la xidido oo ay seerfarkooda Zaadka ka saaraan wixii ka yar $100.
TELESOM waxay isku dayaysaa inay hoos u dhigaan lacagta adag ee muwaadiniinta qurbaha ku nooli ay eheladooda u soo diraan, waxaanay awooda saaraysaa in lacagta adag ee doolarku ku dhacdo adeegooda ZAAD-ka oo lagu tilmaamay inuu ka mid yahay tiirarka ugu waaweyn ee dhaliyay sicir-bararka iyo sarif bararka is barkan ee ka jira Jamhuuriyadda Somaliland.
Shirkadani waxay qaaday barnaamij ay ku sii ballaadhsanayso nidaamka lacagta lagu xawilo Telefoonada gacanta (Mobile Money), oo ay daboolka ka qaaday inay qiime dhimis ku sameysay khidmada lacagaha dibada laga soo diro ee lagu xawilayo Zaadka. “Zaad Services wuxuu kuugu bushaareynayaa in qiime dhimis ballaadhan laguugu sameeyay khidmada xawaaladda dibadda. Marka aad ka dirayso Mobile-kaaga,”ayaa lagu yidhi Fariin shirkadda TELESOM ay u dirtay macaamiisheeda Salaasadii toddobaadkan.
Tallaabadani waxay hordhac u tahay facaa’ilka TELESOM ku doonayso inay ku dhicisayso qorshihii xukuumadda ee suulinta sicir-bararka. Waxase ay kiishash waaweyn oo hor leh ay u tolatay inay urursato xadiga ugu badan ee lacagaha dibada laga soo xawilo oo haddii wadanka ay soo gaadhi lahayd wax ka bedali lahayd baahida doolarka ee suuqyada ganacsiga ka jirta.
Guddidii Madaxweynuhu u saaray xakamaynta sicir-bararka, ayaan la garanaynin asbaabaha ay indhaha uga qarsanayaan inay farta ku fiiqaan xeeladaha TELESOM kaga soo horjeedo meel-marinta go’aamadii xukuumadda.
