Golaha amaanka oo ka shiraya gantaalka dowladda Waqooyiga Kuuriya ay dul marisay Japan

Gollaha Amaanka QM ayaa kulan deg deg lagu wadaa in ay ka yeeshaan arintan ku saabsan gantaalka dowladda Waqooyiga Kuuriya ay dulmarisay hawada dalka Japan.

Ra’iisul wasaaraha dalka Japan Shinzō Abe iyo Madaxweynaha Mareykanka Donald Trump oo mudo 40-daqiiqo ah ku wada hadlayay Qadka Telfoonka ayaa si wadajir ah u codsaday kulankan.

Shinzō Abe oo la hadlayay wakaalada wararka France ee AP ayaa sheegay in ujeedada kulanka ay tahay in la kordhiyo cuna-qabateynta Kuuriyada Waqooyi, maadaama ay ku xad gudbeen hawada Japan, wuxuuna ugu baaqay dowladaha Ruushka iyo Shiinaha in ay door weyn ka qaataan in talaabo laga qaado xukuumada Pyongyang.

Sidoo kale ra’iisul wasaaraha Japan wuxuu sheegay in madaxweyne Donald Trump uu ku celceliyay in uu garab taagan yahay Japan, isla markaana ay dhinac kaga soo jeesanayaan Hanjabaada kaga imaaneysa dowlada Waqooyiga Kuuriya.

Waa markii ugu horeysay oo dalka Japan uu si toos ah u dulmaro gantaal ay soo ridday Kuuriyada Waqooyi tan iyo markii ay sare u qaaday tijaabada gantaalada ridada dheer.

Todobaadkii hore ayaa Kuuriyada Waqooyi waxaa ay tijaabisay seddax gantaal, balse waxay militariga Mareykanku ay ku sheegeen in ay ahaayeen kuwo fashilmay.

error: Content is protected !!