Kenya(GNN)- Qaar ka mid ah Warbaahinta caalamka ayaa falanqeysay Warsaxaafadeedkii Xukuumadda Somaliland Arbacadii ay ku naqdiday Tallaabadii ay dawladda Soomaaliya ku amartay inuu dalkeeda ka baxo ergayga Qarammada Midoobay Mr. Nicholas Haysom.
Siday ku warantay Wakaallada Wararka Somaliland ee SOLNA, Wakiilka Somaliland u fadhiya Kenya Baashe Cawil Cumar, ayaa Wargeyska Standard ee ka soo baxa dalka Kenya u sheegay inay jiraan ajandeyaal u qarsoon dawladda Muqdisho oo sababay in ay Soomaaliya ku dhawaaqdo mastaafurinta
ergeyga Qarammada Midoobay Nicholas Haysom.
Danjire Baashe Cawil wuxuu intaas ku daray inay Nicholas Haysom uu dedaal geliyey sidii dib loogu bilaabi lahaa wadahadalka u dhexeeya Somaliland Iyo Soomaaliya. Waxa kaloo uu caddeeyey in Somaliland kala shaqeynayso beesha caalamka sidii loo furdaamin lahaa arrimaha ka taagan mandaqada Geeska Afrika.
Wakiilka Somaliland u fadhiya Kenya, Baashe Cawil Cumar, wuxuu u xaqiijiyey Warsidaha Standard in aanu khusaynin Somaliland go’aanka tarxiilka ergayga Qarammada midoobay,waxaanu xusay In Jamhuuriyadda Somaliland ay si mugle ula shaqeynayso Wakiillada UN-ka ugu sareeya ilaa heerka ugu hooseeya.
Sidoo kale, waxa danjire Baashe Cawil uu ku ammaanay qarammada midoobay inay kaalin weyn ka qaadatay gargaarka bini’aadanimada Soomaalida.
GABILEY.NET
