Boqorka Sacuudiga ayaa dhalleeceeyay weerar hubeysan oo ka dhacay xarun ay ciidamada Mareykanku leeyihiin.
Weerarka uu ardeyga u dhashay Sacuudiga ka dambeeyay wuxuu boqor Salmaan ku tilmaamay “mid wuxuushnimo ah”, sida madaxweyne Trump laga soo xigtay.
Wuxuu Trump bartiisa Twitter-ka ku qoray in boqorka uu telefoonka ka wacay si uu “si daacadnimo ah uga tacsiyeeyo”.
Ardeyga u dhashay Sacuudiga oo baranayay duullimaadyada ciidamada Cirka wuxuu dilay seddax qof, wuxuuna dhaawacay siddeed qof oo kale, ka dib ayaana isagii la toogtay.
Maayarka gobolka uu saldhigga ku yaallo ee Florida, Ron DeSantis wuxuu sheegay in dowladda Sacuudiga ay “hadda magdhow ka doonayaan qoysaska dhibbanayaasha”.
Ardeyga weerarka qaaday waxay warbaahinta Mareykanka ku magacaabeen Maxamed Saciid Alshamrani. Wuxuuna weerarka u adeegsaday bastoolad.
FBI-da weli ma aysan shaacin sababta weerarka ku kalliftay ardeyga, balse waxay barayaan in xiriir argagixisa uu jiro.
“Waxa jiro warar badan oo la isla dhexmarayo, balse FBI waxay eegtaa xaqiiqooyiinka oo keli ah,” ayuu sheegay sargaalka gaarka ah Rachel Rojas oo shir jaraa’id qabtay xalay.
Sucuudi Carabiya waa xulafo muhiim u ah Mareykanka ee Barig Dhexe, waxaa in mudda ah labada dal ka dhexeeyay is dhaafsiga barnaamijyada militariga.
Toogashadanna waxay su’aal gelisay baaritaanka lagu sameeyo saraakiisha militari ee dibadda ka taga ee lagu tababaro xeryaha ciidamada Mareykanka.
Waa weerarkii labaad ee isbuucan ka dhaca saldhig tababar oo ay leeyihiin ciidamada Mareykanka.
Bad-maaxe u dhashay Mareykanka ayaa dilay laba qof oo militari ahayd oo ay isla shaqeynayeen. Wuxuu weerarkaa Arbacadii ka dhacay saldhigga ciidan ee Hawaii.
